முத்தியால்பேட்டை தொகுதியில் உள்ள 2 சாராய கடைகளின் ஏலத்தை ரத்த செய்ய வேண்டும் - வையாபுரி மணிகண்டன் எம்.எல்.ஏ.

புதுச்சேரி,

புதுச்சேரி முத்தியால்பேட்டை தொகுதி எம்.எல்.ஏ. வையாபுரி மணிகண்டன், கவர்னர் கிரண்பெடியை சந்தித்து கோரிக்கை மனு அளித்தார். அந்த மனுவில் கூறியிருப்பதாவது:–

மத்திய அரசின் ஸ்மார்ட் சிட்டி திட்டத்தில் புதுவை முத்தியால்பேட்டை தொகுதியும் இணைக்கப்பட உள்ளது. ஸ்மார்ட் சிட்டி திட்டம் செயல்படுத்தும் பகுதிகளில் கள் மற்றும் சாராயக்கடை இருக்கக்கூடாது என்பது விதிமுறை. அதன்படி முத்தியால்பேட்டை தொகுதியில் உள்ள 2 சாராயக்கடைகள் உள்பட புதுச்சேரி நகரில் உள்ள 5 சாராய கடைகள் அகற்றப்பட்டன. இது குறித்து அரசிதழிலும் அறிவிப்பு வெளியானது. அதனைத் தொடர்ந்து மீதியுள்ள சாராய கடைகளுக்கு ஏலம் விட நடவடிக்கை எடுக்கப்பட்டு வருகிறது.

இந்த நிலையில் முத்தியால்பேட்டை தொகுதியில் அகற்றப்பட்ட 2 சாராய கடைகளை மீண்டும் ஏலம் விட நடவடிக்கை எடுக்கப்பட்டு வருகிறது. இதனால் அந்த பகுதியில் ஸ்மார்ட் சிட்டி திட்டம் வராத நிலை உருவாகும். எனவே இந்த வி‌ஷயத்தில் கவர்னர் நேரடியாக தலையிட்டு முத்தியால்பேட்டை தொகுதியில் உள்ள 2 சாராய கடைகளின் ஏலத்தை ரத்து செய்ய வேண்டும். திட்டமிட்டபடி முத்தியால்பேட்டை தொகுதியில் ஸ்மார்ட் சிட்டி திட்டத்தை செயல்படுத்தி வளர்ச்சி பணிகள் மேற்கொள்ள வேண்டும்.

இவ்வாறு அந்த மனுவில் கூறப்பட்டுள்ளது. இந்த சந்திப்பின்போது வையாபுரி மணிகண்டனுடன் எம்.எல்.ஏ.க்கள் அன்பழகன், பாஸ்கர் ஆகியோர் உடனிருந்தனர்.