சுவர் இடிந்து விழுந்ததில் உயிரோடு புதைந்து பெண் பலி; கணவர் கவலைக்கிடம்

நாகர்கோவில் அருகே தாழக்குடியை அடுத்த கீழத்தெரு பகுதியை சேர்ந்தவர் உமையோரன்பிள்ளை (வயது 48), கட்டிட தொழிலாளி. அவருடைய மனைவி சந்திரிகா (40). இவர்களுடைய மகள் தேவி ஈஸ்வரி 12-வது வகுப்பும், மகன் வேல்முருகன் 11-வது வகுப்பும் படித்து வருகிறார்கள். இவர்கள் ஓட்டு வீட்டில் வசித்தனர். அது மண் சுவரால் கட்டப்பட்ட வீடாகும்.

நேற்று முன்தினம் இரவில் உமையோரன்பிள்ளை, அவருடைய மனைவி ஒரு அறையிலும், மகள் தேவி ஈஸ்வரி மற்றொரு அறையிலும் தூங்கிக் கொண்டிருந்தனர். மகன் வேல்முருகன் மட்டும் கண்விழித்து படித்துக் கொண்டிருந்தார்.

நள்ளிரவில் கணவன்-மனைவி தூங்கி கொண்டிருந்த அறையின் ஒரு பக்க சுவரானது திடீரென்று இடிந்து உள்பக்கமாக விழுந்தது. தூங்கிக் கொண்டிருந்த உமையோரன்பிள்ளை, அவருடைய மனைவி சந்திரிகா மீது இடிபாடுகள் விழுந்ததால், அவர்கள் உயிரோடு புதைந்தனர்.

தன் கண் முன்னே தாய், தந்தை இடிபாடுகளுக்குள் சிக்கி இருப்பதை அறிந்து மகன் வேல்முருகன் அலறினார். இதற்கிடையே தூங்கி கொண்டிருந்த தேவி ஈஸ்வரி பதறியபடி ஓடி வந்தார். இருவரும் புதையுண்டு கிடந்த பெற்றோரை காப்பாற்ற முயன்றனர்.

சுவர் இடிந்து விழுந்த சத்தம் கேட்டு அக்கம் பக்கத்தினரும் அங்கு ஓடி வந்தனர். இடிபாடுகளை அகற்றி, புதையுண்டு கிடந்த இருவரையும் மீட்டு சிகிச்சைக்காக அருகில் உள்ள ஒரு ஆஸ்பத்திரிக்கு கொண்டு சென்றனர். ஆனால், சந்திரிகா பரிதாபமாக இறந்துவிட்டார்.

படுகாயம் அடைந்த உமையோரன்பிள்ளை தேரேக்கால்புதூரில் உள்ள ஒரு ஆஸ்பத்திரியில் சேர்க்கப்பட்டுள்ளார். அங்கு அவருக்கு தீவிர சிகிச்சை அளிக்கப்பட்டு வருகிறது. அவருடைய நிலைமை கவலைக்கிடமாக உள்ளது.