போலீஸ் சப்-இன்ஸ்பெக்டரை கொல்ல முயன்ற வாலிபர் கைது

விழுப்புரம், 

வளவனூர் போலீசார் ஒரு குற்ற வழக்கில் தொடர்புடைய வளவனூர் அம்பேத்கர் தெருவை சேர்ந்த தணிகை வேலன் (வயது 32) என்கிற வாலிபரை தேடி வந்தனர். இந்தநிலையில் தணிகைவேலன் வளவனூர்- சிறுவந்தாடு சாலை நின்று கொண்டிருப்பதாக வளவனூர் போலீசாருக்கு ரகசிய தகவல் கிடைத்தது. அதன்பேரில் போலீஸ் சப்-இன்ஸ்பெக்டர் சங்கரசுப்பிரமணியன் மற்றும் போலீசார் அங்கு விரைந்து சென்று, தணிகைவேலனை கைது செய்ய முயன்றனர். அப்போது அவர், போலீசாரை பார்த்து தகாத வார்த்தையால் திட்டியதோடு, போலீசாரை அரசு பணியை செய்ய விடாமல் தடுத்தார். இதையடுத்து சப்-இன்ஸ்பெக்டர் சங்கரசுப்பிரமணியன், தணிகைவேலனை மடக்கி பிடிக்க முயன்றார். அப்போது அவர், தான் வைத்திருந்த கத்தியால் சப்-இன்ஸ்பெக்டர் சங்கரசுப்பிரமணியனின் இடது கையில் குத்தி விட்டு அங்கிருந்து தப்பி ஓடினார்.

உடனே மற்ற போலீசார் தணிகைவேலனை மடக்கிப்பிடித்தனர். அதைத்தொடர்ந்து, தணிகைவேலன் மீது கொலை முயற்சி பிரிவின் கீழ் போலீசார் வழக்குப்பதிவு செய்து கைது செய்தனர். பின்னர் அவரை விழுப்புரம் கோர்ட்டில் ஆஜர்படுத்தி சிறையில் அடைத்தனர்.