வியாபாரியிடம் கத்தியைக்காட்டி மிரட்டி பணம் பறிக்க முயற்சி; 2 பேர் கைது

செங்குன்றம்,

செங்குன்றத்தை அடுத்த பாடியநல்லூர் ஈஸ்வரன் கோவில் தெருவைச் சேர்ந்தவர் தங்கராசு(வயது50). இவர் அதே பகுதியில் பெட்டிக்கடை நடத்தி வருகிறார். இவர் நேற்று காலை ஈஸ்வரன் கோவில் அருகே நடைபயிற்சியில் ஈடுபட்டுக்கொண்டு இருந்தார்.

அப்போது மோட்டார் சைக்கிளில் வந்த 2 வாலிபர்கள் அவரிடம் கத்தியை காட்டி மிரட்டி பணம் பறிக்க முயன்றனர். அப்போது அங்கிருந்த பொதுமக்கள் அவர்களை விரட்டி பிடிக்க முயன்றனர். ஆனால் அவர் கள் தப்பி ஓடி விட்டனர்.

இதுகுறித்து செங்குன்றம் போலீசார் வழக்கு பதிவு செய்து வியாபாரியிடம் பணம் பறிக்க முயன்றவர்களை தேடிவந்தனர்.

இதற்கிடையே நேற்று மாலை போலீசார் வாகன சோதனையில் ஈடுபட்டுக்கொண்டிருந்தனர். அப்போது சந்தேகத்துக்கு இடமான 2 பேர் போலீசாரிடம் சிக்கினர். அவர்களிடம் போலீசார் நடத்திய விசாரணையில் ‘அவர்கள் புழல் திருமாறன் தெருவைச்சேர்ந்த சக்தி என்ற சதீஷ்(22), மணிகண்டன்(24) என்பதும் அவர்கள் தான் வியாபாரி தங்கராசுவை மிரட்டி பணம் பறிக்க முயன்றதும்’ தெரியவந்தது.

இதைத்தொடர்ந்து செங்குன்றம் போலீசார் 2 பேரையும் கைது செய்தனர். போலீஸ் சப்-இன்ஸ்பெக்டர் கென்னடி வழக்கு பதிவு செய்து, அவர்களை கோர்ட்டில் ஆஜர்படுத்தி புழல் ஜெயிலில் அடைத்தார்.

கைதான 2 பேரிடம் இருந்து கத்தியும், மோட்டார்சைக்கிளையும் போலீசார் பறிமுதல் செய்தனர்.