மாணவனை மிரட்டி மசாஜ் செய்ய வைத்த பள்ளி ஆசிரியர்

திண்டுக்கல்,

திண்டுக்கல் மாவட்டம் முழுவதும் வாட்ஸ்-அப் மற்றும் சமூக வலைத்தளங்களில் பள்ளி மாணவர் ஒருவர் தனது ஆசிரியருக்கு மசாஜ் செய்வது போன்ற வீடியோ காட்சி கடந்த வாரம் வேகமாக பரவியது. இந்த தகவல் மாவட்ட முதன்மை கல்வி அலுவலர் சாந்தகுமாரின் கவனத்துக்கு கொண்டு செல்லப்பட்டது. அவர் நடத்திய முதற்கட்ட விசாரணையில், ஒட்டன்சத்திரம் அருகே உள்ள இடையக்கோட்டை நேருஜி அரசு மேல்நிலைப்பள்ளியில் இந்த சம்பவம் நடந்தது கண்டுபிடிக்கப்பட்டது.

இதுதொடர்பாக விசாரணை நடத்தும்படி பழனி கல்வி மாவட்ட அலுவலர் கருப்புசாமிக்கு, முதன்மை கல்வி அலுவலர் உத்தரவிட்டார். அதன்பேரில், பள்ளிக்கு நேரில் சென்று கருப்புசாமி விசாரணை நடத்தினார். பின்னர், முதன்மை கல்வி அலுவலர் சாந்தகுமாரும் பள்ளிக்கு சென்று சம்பந்தப்பட்ட மாணவன், ஆசிரியர், தலைமை ஆசிரியர் ஆகியோரிடம் தனித்தனியாக விசாரணை நடத்தினார்.

இதற்கிடையே, சம்பந்தப்பட்ட மாணவன் தனது பெற்றோருடன் நேற்று திண்டுக்கல் கலெக்டர் அலுவலகத்துக்கு நேரில் வந்து ஒரு புகார் மனு அளித்தான். அதில், மாணவனின் தந்தை கூறியிருப்பதாவது:-

கடந்த 20 நாட்களுக்கு முன்பு பள்ளியில் படித்துக்கொண்டிருந்த எனது மகனை ஆசிரியர் ஒருவர் அழைத்துள்ளார். பின்னர், ஆசிரியர் ஓய்வு அறைக்கு கூட்டிச் சென்று அவருக்கு மசாஜ் செய்து விடுமாறு மிரட்டி இருக்கிறார். இதனால், பயந்து கொண்டு அவனும் மசாஜ் செய்துள்ளான். மறுநாளே, இந்த சம்பவம் வீடியோவாக சமூக வலைத்தளங்களில் பரவியது. இதையடுத்து, பள்ளிக்கு சென்ற எனது மகனை சக மாணவர்கள் எனக்கும் மசாஜ் செய்துவிடு என்று கேலி செய்கிறார்கள். இதனால் மன உளைச்சலுக்கு ஆளான அவன் பள்ளிக்கு செல்லமாட்டேன் என்று கூறினான்.

இதுதொடர்பாக முதன்மை கல்வி அலுவலரிடம் புகார் அளித்தேன். அவரும், நேரில் வந்து எனது மகனிடம் விசாரித்து, எழுதி வாங்கி சென்றார். இதற்கிடையே, சம்பந்தப்பட்ட ஆசிரியர் எனது மகனை அழைத்து மசாஜ் செய்தது நாடகத்திற்காக எடுக்கப்பட்ட ஒத்திகை என்று கூறுமாறு தெரிவித்துள்ளார். இல்லையென்றால் உன்னை பள்ளியில் படிக்க விடமாட்டேன், காணாமல் செய்து விடுவேன் என்றும் மிரட்டி இருக்கிறார்.

இதனால், அவன் பள்ளிக்கு செல்லவே பயப்படுகிறான். எனது மகனின் எதிர்காலம் குறித்து எங்களுக்கு கவலையாக உள்ளது. சம்பந்தப்பட்ட ஆசிரியரிடம் அதிகாரிகள் விசாரணை நடத்தி 8 நாட்கள் ஆகியும், இதுவரை நடவடிக்கை எடுக்கப்படவில்லை. அவர் மீது உடனடியாக நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.