தஞ்சையில் விமானப்படைக்கு ஆட்கள் தேர்வு தொடங்கியது இளைஞர்கள் பங்கேற்பு

தஞ்சாவூர்,

தஞ்சை மருத்துவக்கல்லூரி சாலை கணபதி நகரில் உள்ள அன்னை சத்யா விளையாட்டு அரங்கில் இந்திய விமானப்படை மருத்துவ உதவியாளர் பணிக்கு ஆட்கள் தேர்வு நேற்று அதிகாலை 5 மணிக்கு தொடங்கியது.

முதல் நாளில் சென்னை, அரியலூர், கோவை, காஞ்சீபுரம், கரூர், கிருஷ்ணகிரி, நாகை, பெரம்பலூர், புதுக்கோட்டை, தஞ்சை, திருவள்ளூர், திருவாரூர், திருவண்ணாமலை, திருப்பூர், திருச்சி, வேலூர், விழுப்புரம் ஆகிய 17 மாவட்டங்களை சேர்ந்த 2 ஆயிரத்திற்கும் மேற்பட்ட இளைஞர்கள் பங்கேற்றனர்.

தேர்வில் கலந்து கொண்டவர்களின் சான்றிதழ்கள் முதலில் சரிபார்க்கப்பட்டன. பின்னர் உயரம், உடல் எடை ஆகியவை சரிபார்க்கப்பட்டன. இதில் தேர்ந்தெடுக்கப்பட்டவர்களுக்கு 1.6 கிலோ மீட்டர் தூரத்தை 6 நிமிடங்கள், 30 வினாடிகளுக்குள் கடந்து செல்லுதல், 1 நிமிடத்திற்குள் 10 முறை உட்கார்ந்து எழுதல் போன்ற உடல் தகுதி தேர்வு நடத்தப்பட்டது.

மேலும் உடலில் தோல் நோய்கள், தொற்றுநோய்கள் இருக்கிறதா? என்றும், பார்வை திறன் நன்றாக இருக்கிறதா? என்றும் பரிசோதனை மேற்கொள்ளப்பட்டது. உடலில் பச்சை குத்தியிருந்தவர்கள் திருப்பி அனுப்பி வைக்கப்பட்டனர்.

உடல் தகுதி தேர்வில் தேர்ச்சி அடைந்தவர்களுக்கு எழுத்துத்தேர்வு நடத்தப்பட்டது. தஞ்சை விமானப்படையின் அணி தலைவர் ஸ்ரீவத்சன், கட்டளை அலுவலர்கள் சைலேஷ்குமார், ஜமால் மற்றும் அதிகாரிகள் மேற்பார்வையில் இந்த தேர்வு நடந்தது. மாவட்ட கலெக்டர் அண்ணாதுரை, ஆர்.டி.ஓ. சுரேஷ், தாசில்தார் அருணகிரி ஆகியோர் ஆட்களை தேர்வு செய்யப்படுவதை நேரில் பார்வையிட்டனர்.

வருகிற 26-ந் தேதி கடலூர், தர்மபுரி, திண்டுக்கல், ஈரோடு, கன்னியாகுமரி, மதுரை, நாமக்கல், ராமநாதபுரம், சேலம், சிவகங்கை, நீலகிரி, தேனி, திருநெல்வேலி, தூத்துக்குடி, விருதுநகர் ஆகிய 15 மாவட்டங்களை சேர்ந்தவர்களுக்கும், புதுச்சேரி, காரைக்கால் பகுதியை சேர்ந்தவர்களுக்கும் உடல் தகுதி தேர்வு, எழுத்து தேர்வு நடக்கிறது. வருகிற 28-ந் தேதி வரை இந்த தேர்வு நடக்கிறது.