மனோன்மணியம் சுந்தரனார் பல்கலைக்கழகத்தில் இன்று பட்டமளிப்பு விழா கவர்னர் பங்கேற்பு

நெல்லை,

இதுகுறித்து நெல்லை மனோன்மணியம் சுந்தரனார் பல்கலைக்கழக துணைவேந்தர் பாஸ்கர் நேற்று நிருபர்களுக்கு பேட்டி அளித்தார். அப்போது அவர் கூறியதாவது:-

நெல்லை மனோன்மணியம் சுந்தரனார் பல்கலைக்கழகத்தில் 26-வது பட்டமளிப்பு விழா நாளை (அதாவது இன்று) மதியம் 1.30 மணிக்கு பல்கலைக்கழக வளாகத்தில் உள்ள வ.உ.சிதம்பரனார் அரங்கத்தில் நடக்கிறது. தமிழக கவர்னர் பன்வாரிலால் புரோகித் தலைமை தாங்கி, மாணவ-மாணவிகளுக்கு பட்டங்களை வழங்குகிறார். உயர்கல்வித்துறை அமைச்சர் கே.பி.அன்பழகன் வாழ்த்தி பேசுகிறார்.

சென்னை பல்கலைக்கழக முன்னாள் துணைவேந்தரும், போரூர் ராமச்சந்திரா மருத்துவக்கல்லூரி மற்றும் ஆராய்ச்சி நிறுவன ஆய்வுப்புல முதன்மையாளருமான எஸ்.பி.தியாகராஜன் கலந்து கொண்டு பட்டமளிப்பு விழா உரையாற்றுகிறார். மொத்தம் 48 ஆயிரத்து 836 மாணவ-மாணவிகளுக்கு பட்டம் வழங்கப்படுகிறது. இதில் நேரடியாக 506 பேர் பட்டம் பெறுகிறார்கள். 83 பேர் தரவரிசை பட்டியலில் இடம்பிடித்துள்ளனர். அவர்களுக்கு பதக்கம் வழங்கப்படுகிறது.

இதில் திருச்செந்தூர் கோவிந்தம்மாள் ஆதித்தனார் மகளிர் கல்லூரி மாணவி ஹைருன் ரைசா பானு, நெல்லை ராணி அண்ணா அரசு மகளிர் கல்லூரி மாணவிகள் ராமலட்சுமி, சாந்தி, நெல்லை சாரதா மகளிர் கல்லூரி மாணவி அர்ச்சனா, தூத்துக்குடி ஹோலிகிராஸ் ஹோம் சயின்ஸ் கல்லூரி மாணவி அபியா மச்சோடா ஆகியோர் தலா 2 பதக்கங்களை பெறுகின்றனர். இதுதவிர 423 பேர் பி.எச்.டி. பட்டம் பெறுகின்றனர்.

1-ந்தேதி (புதன்கிழமை) 2-ம் நாள் நிகழ்ச்சியாக பல்கலைக்கழக துறை மாணவர்களுக்கு பட்டமளிப்பு விழா நடக்கிறது. அன்று காலை 11 மணிக்கு பல்கலைக்கழகத்தில் நடைபெறும் விழாவில் மும்பை இந்திய தொழில்நுட்ப கழக ரசாயன பொறியியல் துறை பேராசிரியர் கண்ணன் மட்கல்யா சிறப்பு விருந்தினராக கலந்து கொண்டு, 805 மாணவ-மாணவிகளுக்கு பட்டங்களை வழங்குகிறார்.

2-ந்தேதி (வியாழக்கிழமை) 3-ம் நாள் நிகழ்ச்சியாக நெல்லை மனோன்மணியம் சுந்தரனார் பல்கலைக்கழக கல்லூரிகள் மற்றும் உறுப்பு கல்லூரிகளில் பயின்ற மாணவ-மாணவிகளுக்கு பட்டமளிப்பு விழா நடக்கிறது. விழாவில் திருவனந்தபுரம் அறிவியல் கல்வி மற்றும் ஆராய்ச்சி நிறுவன இயக்குனர் வி.ராமகிருஷ்ணன் சிறப்பு விருந்தினராக கலந்து கொண்டு 1,250 மாணவ-மாணவிகளுக்கு பட்டங்களை வழங்குகிறார். பல்கலைக்கழக வரலாற்றிலேயே முதல்முறையாக தேர்வு முடிந்து ஒரே மாதத்தில் தேர்வு முடிவுகள் வெளியிடப்பட்டு உள்ளன.

முன்னதாக, பட்டமளிப்பு விழாவில் கலந்துகொள்ள கவர்னர் பன்வாரிலால் புரோகித் நாளை (இன்று) காலை சென்னையில் இருந்து விமானம் மூலம் தூத்துக்குடி வருகிறார். பின்னர் அங்கிருந்து கார் மூலம் நெல்லை மனோன்மணியம் சுந்தரனார் பல்கலைக்கழகத்துக்கு வருகிறார். பல்கலைக்கழக வளாகத்தில் ரூ.2 கோடியே 80 லட்சம் செலவில் கட்டப்பட்ட மாணவிகள் விடுதியை கவர்னர் திறந்து வைக்கிறார். பின்னர் பட்டமளிப்பு விழா முடிந்ததும், மாலையில் கவர்னர் சென்னை செல்கிறார்.

விழாவில், தமிழக அமைச்சர்கள், கலெக்டர் ஷில்பா, எம்.பி.-எம்.எல்.ஏ.க்கள், பேராசிரியர்கள், மாணவ-மாணவிகள் கலந்து கொள்கிறார்கள்.

இவ்வாறு அவர் கூறினார். பேட்டியின்போது, பல்கலைக்கழக தேர்வு கட்டுப்பாட்டு அலுவலர் சுருளியாண்டி உடன் இருந்தார்.