ஸ்டவ் வெடித்து பெண் பலி: சிகிச்சை பலனின்றி கணவரும் சாவு

வடமதுரை, 

வடமதுரை அருகே உள்ள செங்குளத்துப்பட்டியைச் சேர்ந்தவர் காளஸ்வரன்(வயது25). இவர் போர்வெல் லாரியில் தொழிலாளியாக வேலை செய்து வந்தார். இவரது மனைவி நாகஜோதி(24). இவர்களுக்கு நிஷாந்த்(5), நந்தக்குமார்(3) என 2 மகன்கள் உள்ளனர். கடந்த 9-ந்தேதி நாகஜோதி வீட்டில் சமையல் செய்தபோது மண்எண்ணெய் ஸ்டவ் திடீரென வெடித்து சிதறியது. 

இதில் நாகஜோதியின் உடல் முழுவதும் தீப்பற்றியது. அப்போது அவரை காப்பாற்ற சென்ற காளஸ்வரனுக்கும், அருகில் அமர்ந்திருந்த நந்தக்குமார் மீதும் தீப்பற்றியது. அவர்களை அருகிலிருந்தவர்கள் மீட்டு திண்டுக்கல் அரசு மருத்துவமனையில் சிகிச்சைக்கு சேர்த்தனர். அங்கு நாகஜோதி சிகிச்சை பலனின்றி மறுநாள் பரிதாபமாக உயிரிழந்தார். காளஸ்வரனுக்கு மதுரை அரசு மருத்துவமனையிலும், நந்தக்குமாருக்கு திண்டுக்கல் அரசு மருத்துவமனையிலும் சிகிச்சை அளிக்கப்பட்டு வந்தது. 

இந்த நிலையில் சிகிச்சை பலனின்றி காளஸ்வரன் நேற்று காலை பரிதாபமாக இறந்தார். இதுகுறித்து வடமதுரை போலீசார் வழக்குப்பதிவு செய்து விசாரணை நடத்தி வருகின்றனர்.