தொழிலாளி வீட்டில் நகை திருட்டு

சின்னமனூர்,

சின்னமனூர் அருகே உள்ள மார்க்கையன்கோட்டை வீரணன் தெருவை சேர்ந்தவர் முருகேசன் (வயது 55). கூலித்தொழிலாளி. இவரும், அவருடைய மனைவியும் வேலைக்கு செல்லும் போது வீட்டை பூட்டி விட்டு அதே பகுதியில் சாவியை மறைத்து வைத்து செல்வது வாடிக்கை ஆகும். அதன்படி நேற்று முன்தினம் வழக்கம் போல் காலையில் வீட்டை பூட்டிவிட்டு சாவியை அந்த இடத்தில் வைத்து சென்று விட்டனர். பின்னர் மாலையில் வேலை முடிந்து வீடு திரும்பியபோது, தாங்கள் வைத்திருந்த இடத்தில் இருந்து வேறு இடத்தில் சாவி இருந்தது. 

இதனால் சந்தேகம் அடைந்த முருகேசன் உள்ளே சென்று பார்த்தார். அப்போது பீரோவில் இருந்த 5 பவுன் நகை, ரூ.6 ஆயிரம் ஆகியவை திருட்டு போய் இருப்பதை கண்டு அதிர்ச்சி அடைந்தார். இதுகுறித்து சின்னமனூர் போலீஸ் நிலையத்தில் முருகேசன் புகார் செய்தார். அதன்பேரில் போலீசார் விசாரணை நடத்தி வருகின்றனர். 

கணவன்–மனைவி வேலை சென்ற பிறகு சாவியை எடுத்து கதவை திறந்து பணம், நகையை மர்ம நபர் திருடி சென்றிருப்பது தெரியவந்துள்ளது.