வீட்டின் கதவை உடைத்து ரூ.1 லட்சம் மதிப்புள்ள நகைகள் கொள்ளை மர்ம நபர்களுக்கு போலீஸ் வலைவீச்சு

ஓசூர்,

கிருஷ்ணகிரி மாவட்டம் ஓசூர், சீத்தாராம் மேடு பகுதியில் உள்ள அண்ணாமலை நகரை சேர்ந்தவர் விஷால். இவர் பெயிண்டிங் காண்டிராக்டராக உள்ளார். சம்பவத்தன்று தனது பாட்டியின் இறுதி சடங்கிற்காக திருப்பூர் மாவட்டம் தாராபுரத்திற்கு, குடும்பத்துடன் விஷால் சென்றார். வீட்டில் யாரும் இல்லாததை நோட்டமிட்ட மர்ம நபர்கள் வீட்டின் முன்பக்க கதவை உடைத்து உள்ளே புகுந்தனர்.

பின்னர் அவர்கள் வீட்டில் பீரோவில் இருந்த சங்கிலி, மோதிரம் உள்ளிட்ட மொத்தம் 10 பவுன் நகைகளை கொள்ளையடித்து சென்றனர். இதன் மதிப்பு ரூ. 1 லட்சம் ஆகும். இந்த நிலையில், நேற்று முன்தினம் ஓசூர் திரும்பிய விஷால், வீட்டு கதவு உடைக்கப்பட்டிருப்பதையும், பீரோவில் இருந்த நகைகள் கொள்ளையடிக்கப்பட்டிருப்பதையும் கண்டு அதிர்ச்சியடைந்தார்.

இது குறித்து அவர் ஓசூர் அட்கோ போலீஸ் நிலையத்தில் புகார் செய்தார். அதன்பேரில் போலீசார் சம்பவ இடத்திற்கு விரைந்து சென்று விசாரணை மேற்கொண்டனர். கைரேகை நிபுணர்களும் சம்பவ இடத்திற்கு சென்று அங்கு பதிவாகி இருந்த கைரேகைகளை சேகரித்தனர். இது தொடர்பாக போலீசார் வழக்குப்பதிவு செய்து மர்ம நபர்களை வலைவீசி தேடி வருகின்றனர்.

வீட்டின் கதவை உடைத்து ரூ.1 லட்சம் மதிப்புள்ள நகைகளை மர்ம நபர்கள் கொள்ளையடித்து சென்ற சம்பவம் ஓசூரில் பரபரப்பை ஏற்படுத்தி உள்ளது.