கண்டிப்பாக ஹெல்மெட் அணிய வேண்டும்: சாலை விதிமுறைகளை மீறுபவர்கள் மீது கடும் நடவடிக்கை

காஞ்சீபுரம்,

திருவள்ளூரை அடுத்த மணவாளநகரில் திருவள்ளூர் போக்குவரத்து போலீஸ் சார்பில் சாலை பாதுகாப்பு குறித்த மோட்டார்சைக்கிள் விழிப்புணர்வு பேரணி நடைபெற்றது. பேரணிக்கு திருவள்ளூர் மாவட்ட போலீஸ் சூப்பிரண்டு பொன்னி தலைமை தாங்கி, பேரணியை கொடியசைத்து தொடங்கி வைத்தார். அப்போது அவர், போக்குவரத்து விதிமுறைகள் குறித்த விழிப்புணர்வு வாசகங்கள் அடங்கிய துண்டு பிரசுரங்களை வாகன ஓட்டிகளிடம் வழங்கினார்.

பின்னர் மோட்டார்சைக்கிள் பேரணி மணவாளநகர் சந்திப்பு பகுதியில் இருந்து ஆயில்மில், ஜே.என்.சாலை வழியாக சென்று திருவள்ளூர் காமராஜர் சிலை அருகே முடிவடைந்தது.

அதைதொடர்ந்து மாவட்ட போலீஸ் சூப்பிரண்டு பொன்னி, நிருபர்களிடம் கூறியதாவது:-

விபத்தில் சிக்கி உயிரிழப்பு ஏற்படுவதை தவிர்க்க இருசக்கர வாகனங்களை ஓட்டுபவரும், பின்னால் அமர்ந்து இருப்பவரும் கண்டிப்பாக ஹெல்மெட் அணியவேண்டும். செல்போன் பேசிக்கொண்டு வாகனங்களை ஓட்டக் கூடாது. மது அருந்தியோ, அதிவேகமாகவோ வாகனங்களை ஓட்டக்கூடாது. வாகன ஓட்டிகள் அனைவரும் போக்குவரத்து விதிமுறைகளை கடைப்பிடித்து நடக்க வேண்டும். சாலை விதிமுறைகளை மீறும் வாகன ஓட்டிகள் மீது கடும் நடவடிக்கை எடுக்கப்படும்.

சாலை விபத்துகளை தவிர்க்க வாகன ஒட்டிகள் சாலை விதிகளையும், போக்குவரத்து விதிகளையும் கடைப்பிடிக்க வேண்டும். போக்குவரத்து சிக்னல்களை கவனித்து சாலைகளை கடக்க வேண்டும். இவ்வாறு அவர் கூறினார்.

இந்த விழிப்புணர்வு பேரணியில் துணை போலீஸ் சூப்பிரண்டுகள் ராஜேந்திரன், வெங்கடேசன், இன்ஸ்பெக்டர்கள் செல்லதுரை, தமிழ்வாணன், பாபு, சப்-இன்ஸ்பெக்டர்கள் ராக்கிகுமாரி, பத்மஸ்ரீபப்பி மற்றும் போலீசார் கலந்துகொண்டனர்.