தூத்துக்குடி துப்பாக்கி சூடு சம்பவம்: ஒருநபர் விசாரணை ஆணையத்தில் இதுவரை 24 பேர் வாக்குமூலம்

தூத்துக்குடி, 

தூத்துக்குடியில் நடந்த துப்பாக்கி சூடு சம்பவம் தொடர்பாக, ஒருநபர் விசாரணை ஆணையத்தில் இதுவரை 24 பேர் வாக்குமூலம் அளித்து உள்ளனர்.

துப்பாக்கி சூடு

தூத்துக்குடியில் கடந்த மே மாதம் 22-ந்தேதி நடந்த துப்பாக்கி சூடு மற்றும் தடியடியில் 13 பேர் பரிதாபமாக இறந்தனர். இதுதொடர்பாக விசாரணை நடத்துவதற்காக ஓய்வுபெற்ற ஐகோர்ட்டு நீதிபதி அருணா ஜெகதீசன் தலைமையில் ஒருநபர் விசாரணை ஆணையத்தை தமிழக அரசு அமைத்தது.

அவர் கடந்த ஜூன் மாதம் 4-ந் தேதி தூத்துக்குடிக்கு வந்து பாதிக்கப்பட்டவர்களை நேரில் சந்தித்து ஆறுதல் கூறினார். தொடர்ந்து பாதிக்கப்பட்டவர்களிடம் இருந்து பிரமாண பத்திரங்கள் பெறப்பட்டன. அந்த பிரமாண பத்திரங்கள் அடிப்படையில் சம்மன் அனுப்பப்பட்டு, விசாரணை நடந்து வருகிறது. கடந்த 9-ந்தேதி 2-வது கட்டமாக விசாரணை நடந்தது. அப்போது, பாதிக்கப்பட்ட 10 பேர் ஆணையத்தில் ஆஜராகி வாக்குமூலம் அளித்தனர்.

24 பேர் வாக்குமூலம்

கடந்த 27-ந்தேதி முதல் 3-வது கட்டமாக தூத்துக்குடி தெற்கு பீச் ரோட்டில் உள்ள ஒருநபர் ஆணைய முகாம் அலுவலகத்தில் விசாரணை நடந்து வந்தது. இந்த விசாரணை நேற்று முடிவடைந்தது. 3-வது கட்ட விசாரணையில், மொத்தம் 14 பேர் ஆஜராகி வாக்குமூலம் அளித்தனர். இதன்மூலம் ஒருநபர் ஆணையத்தில் இதுவரை 24 பேர் தங்கள் வாக்குமூலத்தை பதிவு செய்துள்ளனர்.