தினம் ஒரு தகவல் : ரெடிமேடு வீடுகள்

புதிய தொழில்நுட்பத்தை பயன்படுத்தினால் ஒரு நாளில் 4 வீடு கட்டலாம் என்கிறார், கெவின் மூர். நியூசிலாந்தை சேர்ந்த கட்டிடப் பொறியாளரான இவர், இந்த ரெடிமேடு வீட்டு தொழில்நுட்பத்தை கண்டுபிடித்தார். கட்டுமான துறையில் ஆகும் செலவுகளை கட்டுப்படுத்த ஒரு புதிய தொழில்நுட்பம் கொண்டு வர வேண்டும் என மூர் தொடர்ந்து ஆராய்ச்சியில் ஈடுபட்டார்.

தனது பல ஆண்டு முயற்சிக்குப் பிறகு 1985-ம் ஆண்டு அவர் இன்சுலேட் ப்ரீகேஸ்ட் காங்கிரீட் எனப்படும் பேனல்களை உருவாக்கினார். இந்தப் பேனல்களின் மூலம் அவர் வீட்டையே ரெடிமேடாக உருவாக்க முடியும் என்பதை கண்டறிந்தார். இந்தத் தொழில்நுட்பத்திற்காக அவர் 1989-ம் ஆண்டு உரிமமும் பெற்றுள்ளார். இதன் மூலம் முழு வீட்டையும் தொழிற்சாலையிலேயே உருவாக்கிவிட முடியும். வீடு கட்டப்படும் இடத்தில் கொண்டு வந்து இறக்கினால் போதும்.

நியூசிலாந்து, ஆஸ்திரேலியா போன்ற நாடுகளில் பரவலாகப் பயன்படுத்தப்பட்டு வரும் இந்த தொழில்நுட்பம் இப்போது இந்தியாவிலும் பரவலாகி வருகிறது. ஆனால் இந்த தொழில்நுட்பமானது தங்கும் விடுதிகள், சிறிய அறைகள் தொகுப்பு வீடுகளுக்கே பொருத்தமானதாக இருக்கும். பெங்களூரு வளர்ச்சி நிறுவனம் இந்த தொழில்நுட்பத்தை பயன்படுத்தி 12 ஏக்கர் நிலத்தில் 1,520 தொகுப்பு வீடுகளைக் கட்டியுள்ளது.