விழுப்புரத்தில் மோட்டார் சைக்கிள்கள் மோதல்; 2 பேர் பலி

விழுப்புரம், 

விழுப்புரம் அருகே உள்ள திருவாமாத்தூரை சேர்ந்தவர்கள் கிருஷ்ணமூர்த்தி மகன் ரவி (வயது 45), சீனு மகன் பாபு (25). இவர்கள் இருவரும் நேற்று முன்தினம் விழுப்புரம் பகுதிக்கு ஒரு மோட்டார் சைக்கிளில் வந்து விட்டு மீண்டும் திருவாமாத்தூருக்கு புறப்பட்டனர்.விழுப்புரம்- செஞ்சி புறவழிச்சாலையில் இரவு 7 மணியளவில் சாலையை கடக்க முயன்றனர். அப்போது எதிரே விழுப்புரம் ஜி.ஆர்.பி. தெருவை சேர்ந்த வைத்தியலிங்கம் மகன் சிலம்பரசன் (30) என்பவர் செஞ்சி சாலையில் விழுப்புரம் நோக்கி வந்து கொண்டிருந்தார். 2 மோட்டார் சைக்கிள்களும் கண்இமைக்கும் நேரத்தில் நேருக்கு நேர் மோதிக்கொண்டன.

இந்த விபத்தில் ரவி, பாபு, சிலம்பரசன் ஆகிய 3 பேரும் படுகாயம் அடைந்தனர். விபத்து குறித்த தகவல் அறிந்ததும் விழுப்புரம் தாலுகா போலீசார் சம்பவ இடத்திற்கு விரைந்து சென்று பலத்த காயமடைந்த 3 பேரையும் மீட்டு சிகிச்சைக்காக முண்டியம்பாக்கம் அரசு மருத்துவமனையில் சேர்த்தனர்.

அங்கு ரவிக்கு டாக்டர்கள் தீவிர சிகிச்சை அளித்தும் பலனின்றி அவர் இறந்தார். உயிருக்கு ஆபத்தான நிலையில் இருந்த சிலம்பரசனுக்கு முதலுதவி அளித்து, மேல்சிகிச்சைக்காக புதுச்சேரி ஜிப்மர் மருத்துவமனைக்கு அனுப்பி வைத்தனர். அங்கு அவருக்கு டாக்டர்கள் தீவிர சிகிச்சை அளித்தும் பலனின்றி நேற்று காலை பரிதாபமாக சிலம் பரசன் உயிரிழந்தார். பாபு, முண்டியம்பாக்கம் அரசு மருத்துவமனையில் தொடர்ந்து சிகிச்சை பெற்று வருகிறார். இந்த விபத்து குறித்து விழுப்புரம் தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.