மாற்றுத்திறனாளிக்கு 3 சக்கர சைக்கிள் தர மறுத்த அதிகாரிகள்

விருதுநகர்,

சாத்தூர் அமீர்பாளையத்தை சேர்ந்தவர் செல்வராஜ் (வயது 30). மாற்றுத்திறனாளியான இவர் தீப்பெட்டி ஆலையில் பணியாற்றி வருகிறார். இவர் நேற்று காலை கலெக்டர் அலுவலகத்துக்கு தனக்கு 3 சக்கர சைக்கிள் வழங்க கோரி மனு கொடுக்க வந்தார்.

 மனு கொடுத்துவிட்டு சென்று விட்ட அவரை செல்போனில் தொடர்பு கொண்ட அதிகாரிகள், உடனடியாக கலெக்டர் அலுவலகத்துக்கு வந்து 3 சக்கர சைக்கிளை பெற்றுச் செல்லுமாறு தெரிவித்துள்ளனர். ஆனால் செல்வராஜ் தான் சாத்தூர் பஸ் நிலையம் வந்துவிட்டதாக தெரிவித்துள்ளார். இதை தொடர்ந்து வேனில் சைக்கிளை கொண்டு வந்து தருவதாக அதிகாரிகள் தெரிவித்துள்ளனர். அதன்படி வேனில் 3 சக்கர சைக்கிளை சாத்தூருக்கு கொண்டு சென்று செல்வராஜுக்கு தகவல் தெரிவித்தனர்.

 செல்வராஜும் ஒரு பழைய 3 சக்கர சைக்களில் அதிகாரிகளை சந்திக்க வந்தார். அப்போது அதிகாரிகள் செல்வராஜிடம் விசாரணை நடத்திய போது, 3 வருடங்களுக்கு முன்னர் கொடுக்கப்பட்ட 3 சக்கர சைக்கிள் தொலைந்து விட்டதாகவும், இந்த பழைய சைக்கிளை வேறு ஒரு நபர் கொடுத்து உதவியதாகவும் தெரிவித்துள்ளார். அதிகாரிகள் 5 வருடங்களுக்கு பின்னர் தான் புதிதாக 3 சக்கர சைக்கிள் கொடுக்க முடியும் என்ற கூறிவிட்டு அவர்கள் வேனில் கொண்டு சென்ற 3 சக்கர சைக்கிளை செல்வராஜுக்கு கொடுக்க மறுத்ததோடு, உரிய ஆவணங்களுடன் கலெக்டர் அலுவலகம் வருமாறு தெரிவித்துவிட்டு திரும்பி விட்டனர். மாற்றுத்திறனாளி செல்வராஜும் என்ன செய்வது என்று தெரியாமல் தான் வந்த பழைய சைக்களிலேயே திரும்பி சென்றார்.

 சாத்தூரிலேயே உரிய ஆவணங்களை பெற்றுக்கொண்டு 3 சக்கர சைக்கிளை அவருக்கு வழங்கி இருக்கலாம் என்பதே சமூக ஆர்வலர்களின் கருத்தாக உள்ளது.