<
‘எம்.எல்.ஏ. பதவியை ராஜினாமா செய்ய தயார்’ புதுக்கோட்டையில் கருணாஸ் பேட்டி
எப்போது வேண்டுமானாலும் எனது பதவியை ராஜினாமா செய்ய தயாராக இருக்கிறேன் என புதுக்கோட்டையில் கருணாஸ் எம்.எல்.ஏ. நிருபர்களுக்கு பேட்டி அளித்தார்.
புதுக்கோட்டைக்கு முக்குலத்தோர் புலிப்படையின் தலைவர் கருணாஸ் எம்.எல்.ஏ. நேற்று வந்தார். அங்கு அவர் நிருபர்களுக்கு பேட்டி அளித்தார். அப்போது அவர் கூறியதாவது:-
18 எம்.எல்.ஏ.க்கள் தகுதி நீக்க வழக்கில் மேல்முறையீடு செய்தால், அதை காரணம் காட்டி தேர்தல் ஆணையம் தேர்தலை தள்ளிப்போடும். இதன்மூலம் மக்களுக்கு விரோதமான அரசை தொடர்ந்து நடத்துவதற்கு நாம் உதவி செய்தது போல் ஆகிவிடும். எனவே நாம் மேல்முறையீடு செய்யாமல் தேர்தலை சந்திப்போம் என டி.டி.வி.தினகரன் கூறியுள்ளார். அதுவே என்னுடைய கருத்தும் ஆகும்.
எனக்கு மறைந்த முன்னாள் முதல்-அமைச்சர் ஜெயலலிதா தான் இந்த வாய்ப்பை கொடுத்தார். நான் இரட்டை இலை சின்னத்தில் தான் போட்டியிட்டு வெற்றி பெற்றேன். ஜெயலலிதாவின் ஆட்சி கவிழ்ந்து விடக்கூடாது என்ற உணர்வோடு இருந்தவன் நான்.
என் சமுதாயத்திற்காகவும், என் தொகுதி மக்களுக்காகவும் எந்த ஒரு சலுகையும் செய்யாத இந்த அரசில், எம்.எல்.ஏ.வாக தொடர நான் விரும்பவில்லை. எப்போது வேண்டுமானாலும் எனது பதவியை ராஜினாமா செய்ய தயாராக இருக்கிறேன். நான் சம்பளத்திற்காக எம்.எல்.ஏ. பதவிக்கு வரவில்லை.
நான் தமிழ்நாட்டில் எந்த தொகுதியிலும் போட்டியிட தயாராக இருக்கிறேன். சபாநாயகரிடம் இருந்து இதுவரை எனக்கு எந்தவொரு கடிதமும் வரவில்லை. அப்படி வந்தால் அதை எதிர்கொள்ள தயாராக உள்ளேன். தற்போதைய தமிழக அரசு மக்களுக்கான அரசாக இல்லை. சுயநலமான அரசாகவும், ஆட்சியிலும், அதிகாரத்திலும் உள்ளவர்களின் உறவினர்களுக்கு சலுகை செய்யும் அரசாகவும் உள்ளது.
இவ்வாறு அவர் கூறினார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
