ரூ.5 லட்சத்துடன் தப்பி ஓடிய உதவி டைரக்டர் கைது

மும்பை,

அரியானா மாநிலம் சோனிபேட் பகுதியை சேர்ந்தவர் யோகேஷ். டி.வி. நடிகராக இருந்து வருகிறார். இவர் படப்பிடிப்பு தொடர்பாக மும்பைக்கு அடிக்கடி வருவது வழக்கம். இவருக்கு பேஸ்புக்கில் சஞ்சய் சுர்வே என்பவரின் அறிமுகம் கிடைத்தது. மேலும் அவர் உதவி டைரக்டராக இருந்து வருவதாக அவரிடம் தெரிவித்து கொண்டார்.

இதனை தொடர்ந்து கடந்த ஆண்டு புதிய படம் தயாரிக்க போவதாகவும் அதற்கு பணஉதவி வழங்கும்படியும் யோகேஷிடம் அவர் கேட்டார். இதனை நம்பிய யோகேஷ் தனது உறவினர் சச்சின் என்பவரிடம் பேசி பணம் தருவதாக கூறினார்.

இதையடுத்து அந்தேரியில் உள்ள ஓட்டலில் பணப்பையுடன் வந்த யோகேஷ், சஞ்சய் சுர்வேவை சந்தித்து படம் தயாரிப்பு தொடர்பாக பேசி உள்ளார். அப்போது திடீரென சஞ்சய் சுர்வே அங்கிருந்த பணப்பையை எடுத்து கொண்டு தப்பி ஓடி விட்டார். இதை பார்த்து அதிர்ச்சி அடைந்த யோகேஷ் இதுபற்றி போலீசில் புகார் அளித்தார். இந்த புகாரை தொடர்ந்து போலீசார் வழக்கு பதிவு செய்து அவரை தேடி வந்தனர்.

இந்த நிலையில் தலைமறைவான சஞ்சய் சுர்வே குரார் பகுதியில் பதுங்கி இருப்பதாக போலீசாருக்கு தகவல் வந்தது. இதையடுத்து அங்கு சென்ற போலீசார் அவரை பிடித்து கைது செய்தனர். மேலும் இதுகுறித்து அவரிடம்விசாரணை நடத்தி வருகின்றனர்.