காஞ்சீபுரம் நட்சத்திர ஓட்டலை சூறையாடிய வழக்கில் கைதான வாலிபர் சிகிச்சை பலனின்றி சாவு

காஞ்சீபுரம்,

காஞ்சீபுரம் காந்திரோட்டில் உள்ள தனியாருக்கு சொந்தமான நட்சத்திர ஓட்டல், பார் வசதியுடன் உள்ளது. கடந்த மாதம் 28-ந் தேதி பாரில் மது அருந்திய சிலர், போதை தலைக்கேறியதால் ரகளையில் ஈடுபட்டனர். அப்போது அங்கிருந்த ‘சுவிட்ச் போர்ட்டு’ மற்றும் பொருட்களை அடித்து நொறுக்கி சூறையாடினர். இது குறித்த புகாரின்பேரில் சின்ன காஞ்சீபுரம் போலீசார் வழக்குப்பதிவு செய்து, நட்சத்திர ஓட்டலில் பொருட்களை சேதப்படுத்தியதாக காஞ்சீபுரம் பிள்ளையார்பாளையம் சி.எஸ்.எம். தோப்பு தெருவை சேர்ந்த முத்து(வயது 23) அவருடைய தம்பி மாணிக்கம்(21) இருவரையும் கைது செய்து சிறையில் அடைத்தனர்.

மருத்துவமனையில் சாவு

இந்தநிலையில் கைதான மாணிக்கம், திடீரென உடல் நலக்குறைவால் பாதிக்கப்பட்டார். இதற்காக அவரை சென்னையில் உள்ள தனியார் மருத்துவமனையில் சேர்த்தனர்.

அங்கு அவரது உடல்நிலை மோசமானதால் ஸ்டான்லி அரசு மருத்துவமனைக்கு அனுப்பி வைத்தனர். ஆனால் அங்கு சிகிச்சை பலனின்றி நேற்று காலை மாணிக்கம் பரிதாபமாக உயிரிழந்தார்.

போலீசார் தாக்கியதாக புகார்

போலீசார் தாக்கியதால்தான் மாணிக்கம் உயிரிழந்து உள்ளார். எனவே அவரது உடலை பிரேத பரிசோதனை செய்யவேண்டும் என்று கூறி அவரது உடலை வாங்க மறுத்து, அவரது பெற்றோர் மற்றும் உறவினர்கள் போராட்டத்தில் ஈடுபட்டு வருகின்றனர்.

இந்தநிலையில் காஞ்சீபுரம் மாவட்ட போலீஸ் சூப்பிரண்டு சந்தோஷ் ஹதிமானி உத்தரவின் பேரில் காஞ்சீபுரம் துணை போலீஸ் சூப்பிரண்டு பாலசுப்பிரமணியன் வழக்குப்பதிவு செய்து பலியான மாணிக்கம், போலீசார் தாக்கியதால் இறந்தாரா? அல்லது வேறு ஏதேனும் காரணமா? என விசாரித்து வருகின்றனர்.