வாணியம்பாடி அருகே சிறுத்தைப்புலி தாக்கியதில் 5 பேர் படுகாயம் கூண்டு வைத்து பிடிக்க வனத்துறையினர் நடவடிக்கை

வாணியம்பாடி, 

வேலூர் மாவட்டம் வாணியம்பாடியை அடுத்த சிக்கணாங்குப்பம் அருகே நாகலேரி வட்ட பகுதியில் நேற்று காலை அலமேலு என்ற பெண் மாட்டுக்கு தீவனம் எடுக்க கரும்புத் தோட்டத்துக்கு சென்றார். அப்போது அங்கு ஒரு விலங்கு பதுங்கி சத்தமிட்டதாக கூறப்படுகிறது. இதைத்தொடர்ந்து அவர், அருகில் இருந்த ஊர்நாட்டாண்மை பூபதியிடம் தகவல் தெரிவித்தார். அதைத்தொடர்ந்து அவரும், அருகில் இருந்தவர்களும் கரும்புத்தோட்டத்துக்கு சென்றனர்.

அங்கு பதுங்கி இருந்த சிறுத்தைப்புலி திடீரென பாய்ந்து பூபதியை தாக்கியது. இதில் நிலைதடுமாறி அவர் கீழே விழுந்தார். தொடர்ந்து அலமேலுவையும் சிறுத்தைப்புலி தாக்கிவிட்டு அருகில் இருந்த ஏரிப்பகுதிக்கு சென்று முட்புதரில் பதுங்கியது. படுகாயம் அடைந்த 2 பேரையும் அப்பகுதி மக்கள் மீட்டு சிகிச்சைகக்காக வாணியம்பாடி அரசு மருத்துவமனைக்கு அனுப்பி வைத்தனர்.

சிறுத்தைப்புலி தாக்கிய சம்பவம் அப்பகுதியில் காட்டுத்தீ போல் பரவியது. அதைத்தொடர்ந்து ஏராளமானோர் அப்பகுதியில் திரண்டனர். இதில் சிலர் சிறுத்தைப்புலி இருந்த பகுதியை நோக்கி கல்வீசினர். இதனால் கோபம் கொண்ட சிறுத்தைப்புலி மக்கள் கூடி இருந்த கூட்டத்தின் மீது புகுந்து தாக்க ஆரம்பித்தது. இதனால் பொதுமக்கள் உயிர் தப்பினால் போதும் என கருதி நாலாபுறமும் சிதறி ஓடினர். இருப்பினும் சிறுத்தைப்புலி அவர்களை துரத்தியது.

அப்போது சிறுத்தைப்புலி தாக்கியதில் கமல் (25), சந்தோஷ் (24), ரஞ்சித் (20) ஆகியோர் படுகாயம் அடைந்தனர். இவர்களும் சிகிச்சைக்காக வாணியம்பாடி அரசு மருத்துவமனையில் சேர்க்கப்பட்டனர். பொதுமக்கள் கலைந்து ஓடியதால் சிறுத்தைப்புலி மறுபடியும் நாகலேரி முட்புதரில் புகுந்து சத்தமிட்டு வருவதால் பொதுமக்கள் அச்சம் அடைந்துள்ளனர்

இதுகுறித்து தகவல் அறிந்ததும் திருப்பத்தூர் வனத்துறை அதிகாரி சோழராஜன், வாணியம்பாடி போலீஸ் இன்ஸ்பெக்டர் ராமச்சந்திரன், தாசில்தார் கிருஷ்ணவேனி ஆகியோர் சம்பவ இடத்திற்கு விரைந்து வந்தனர்.

சிறுத்தைப்புலியை பிடிக்க வனத்துறை சார்பில் கூண்டு கொண்டு வரப்பட்டு ஏரி பகுதியில் வைக்கப்பட்டுள்ளது. மேலும் சிறுத்தைப்புலியை மயக்க மருந்து செலுத்தி பிடிக்க வண்டலூர், ஓசூரில் இருந்து மயக்க மருந்து நிபுணர்களை வரவழைக்க ஏற்பாடு செய்யப்பட்டுள்ளது.

சிறுத்தைப்புலி தாக்கி படுகாயம் அடைந்து அரசு மருத்துவமனையில் சிகிச்சை பெற்று வருபவர்களை அமைச்சர் நிலோபர்கபில் பார்வையிட்டு ஆறுதல் கூறினார். அப்போது நகர செயலாளர் சதாசிவம் மற்றும் கட்சியினர் உடன் இருந்தனர்.

மேலும் சிறுத்தைப்புலியை பிடிக்க வனத்துறையினர் நடவடிக்கை எடுத்து வருகின்றனர்.

இந்த சம்பவம் அந்த பகுதியில் பெரும் பரபரப்பை ஏற்படுத்தி உள்ளது.