சேலத்தில் நள்ளிரவில் பட்டாசு வெடித்து புத்தாண்டை வரவேற்ற பொதுமக்கள் கிறிஸ்தவ ஆலயங்களில் சிறப்பு பிரார்த்தனை

சேலம்,

2019 புத்தாண்டு பிறந்ததை கொண்டாடும் வகையில் நள்ளிரவு சரியாக 12 மணிக்கு சேலம் மாநகரில் பல்வேறு பகுதிகளில் பொதுமக்கள் பட்டாசு வெடித்து புத்தாண்டை வரவேற்று மகிழ்ந்தனர். சேலம் புதிய மற்றும் பழைய பஸ்நிலையம் எதிரில் ஏராளமான இளைஞர்கள் ஒன்று திரண்டு ஒருவருக்கொருவர் புத்தாண்டு வாழ்த்துகளை தெரிவித்து தங்கள் மகிழ்ச்சியை பரிமாறிக்கொண்டனர்.

அவர்கள் நடனம் ஆடியபடி புத்தாண்டுக்கு வரவேற்பு அளித்தனர். மேலும் நண்பர்கள் பலர் சக நண்பர்களுக்கு கேக் வழங்கி புத்தாண்டு வாழ்த்து தெரிவித்தனர். சேலம் புதிய பஸ்நிலையம், 4 ரோடு, பழைய பஸ்நிலையம் உள்ளிட்ட பல முக்கிய இடங்கள், சாலைகளில் வாலிபர்கள் மோட்டார் சைக்கிளில் சாகசம் செய்ததை பார்க்கமுடிந்தது.

இதே போன்று ஏராளமான இளைஞர்கள் மோட்டார் சைக்கிளில் உற்சாகத்துடன் வேகமாக வலம் வந்து வாகனங்களில் சென்றவர்களிடம் புத்தாண்டு வாழ்த்துகளை தெரிவித்தனர். சில பகுதிகளில் பலூன்களில் புத்தாண்டு வாழ்த்துகள் என்ற வாசகம் எழுதி மேலே பறக்கவிட்டனர். இதே போன்று மாவட்டத்தின் பல்வேறு இடங்களிலும் பொதுமக்கள் புத்தாண்டை உற்சாகமாக வரவேற்று கொண்டாடி மகிழ்ந்தனர்.

சேலம் நகரில் ஒரு சில நட்சத்திர ஓட்டல்களில் புத்தாண்டு கொண்டாட்டத்தையொட்டி சிறப்பு இசை மற்றும் நடன நிகழ்ச்சிகள் நடத்தப்பட்டன. புத்தாண்டையொட்டி அசம்பாவிதங்கள் ஏதும் நடைபெறாமல் இருக்க மாநகரம் மற்றும் மாவட்டம் முழுவதும் ஆயிரத்துக்கும் மேற்பட்ட போலீசார் குவிக்கப்பட்டு தீவிர பாதுகாப்பு பணியில் ஈடுபட்டனர்.

புத்தாண்டு பிறப்பையொட்டி சேலம் 4 ரோடு அருகே உள்ள குழந்தை ஏசு பேராலயத்தில் பங்கு குரு ஜான்ஜோசப் தலைமையில் நள்ளிரவு சிறப்பு பிரார்த்தனை நடைபெற்றது. இதில் ஏராளமான கிறிஸ்தவர்கள் கலந்துகொண்டு பிரார்த்தனை செய்தனர். மேலும் ஒருவருக்கொருவர் புத்தாண்டு நல்வாழ்த்துக்களையும் தெரிவித்து கொண்டனர்.

இதேபோல், அஸ்தம்பட்டி சி.எஸ்.ஐ. இம்மானுவேல் ஆலயம், கலெக்டர் அலுவலகம் அருகில் உள்ள சி.எஸ்.ஐ. ஆலயம், ஜான்சன்பேட்டை புனித அந்தோணியார் ஆலயம், சூரமங்கலம் திருஇருதய ஆலயம், டிரினிட்டி ஆலயம், ஆண்டிப்பட்டி அப்போஸ்தல விசுவாச எழுப்புதல் சபை, செவ்வாய்பேட்டை ஜெயராக்கினி ஆலயம் உள்பட மாவட்டம் முழுவதும் உள்ள கிறிஸ்தவ ஆலயங்களில் நள்ளிரவு சிறப்பு பிரார்த்தனை நடைபெற்றது.