‘தொழில் முதலீட்டாளர்களுக்கு அனைத்து உதவிகளையும் செய்வோம் ’ அமைச்சர் கே.டி.ராஜேந்திரபாலாஜி உறுதி

விருதுநகர்,

உலக முதலீட்டாளர் மாநாடு நடைபெற இருப்பதை முன்னிட்டு விருதுநகரில் மாவட்ட தொழில் மையத்தின் மூலமாக சிறு, குறு மற்றும் நடுத்தர தொழில் முதலீட்டாளர்களுக்கான சிறப்பு கூட்டம், கலெக்டர் சிவஞானம் தலைமையில் நடந்தது. அமைச்சர் கே.டி.ராஜேந்திரபாலாஜி முதலீட்டாளர்களுக்கு புரிந்துணர்வு ஒப்பந்தங்களை வழங்கினார். அப் போது அவர் தெரிவித்ததாவது:–


அருப்புக்கோட்டையில் நெசவு தொழிலுக்கு தேவையான அனைத்து உதவிகளும் செய்து தரப்படும். தொழில் முதலீட்டாளர்களுக்கு தேவையான அனைத்து உதவிகளையும் உடனடியாக தமிழக அரசு செய்து தரும். சாலை வசதி, தண்ணீர் வசதி, மின்சார வசதி, அனுமதி ஆணை உள்ளிட்ட அனைத்து அடிப்படை தேவைகளும் உடனடியாக செய்துதர நடவடிக்கை எடுக்கப்படும்.

இந்த மாவட்டம் மட்டுமின்றி தொழில் தொடங்க ஆர்வமுள்ள பிற மாவட்ட தொழில் முனைவோர்கள் இந்த வாய்ப்பினை பயன்படுத்தி இங்கு தொழில் தொடங்கி பயன்பெற கேட்டுக் கொள்கிறேன். இவ்வாறு கூறினார்.

கூட்டத்தில் சந்திரபிரபா எம்.எல்.ஏ., தொழில் மைய பொது மேலாளர் மாரிமுத்து, துணை இயக்குநர்கள் கமலக்கண்ணன், முருகேசன், விருதுநகர் தொழில் வர்த்தக சங்கத்தலைவர் யோகன், மாவட்ட சிறு, குறு மற்றும் நடுத்தரத் தொழில் நிறுவனங்களின் கவுரவத்தலைவர் பிருந்தாவன் உள்பட பலர் கலந்து கொண்டனர்.