புளியரை அருகே மினி லாரி மோதி 3-ம் வகுப்பு மாணவன் பலி விடுமுறை முடிந்து பள்ளி திறந்த முதல் நாளில் பரிதாபம்

செங்கோட்டை, 

நெல்லை மாவட்டம் புளியரை அருகே உள்ள தாட்கோநகரை சேர்ந்தவர் சவுந்தர்ராஜன். இவருடைய மகன் முகிலன் (வயது 9). இவன் அங்குள்ள அரசு பள்ளியில் 3-ம் வகுப்பு படித்து வந்தான். அரையாண்டு விடுமுறை முடிந்து நேற்று பள்ளிக்கூடம் திறக்கப்பட்டது. காலையில் வழக்கம் போல் பள்ளிக்கு சென்ற முகிலன், மாலையில் பள்ளிக்கூடம் முடிந்ததும் வீட்டுக்கு நடந்து வந்து கொண்டிருந்தான்.

புளியரை மெயின் ரோட்டை கடந்த போது அந்த வழியாக வேகமாக வந்த மினிலாரி, சிறுவன் மீது மோதியது.

இதில் பலத்த காயம் அடைந்த முகிலன் சம்பவ இடத்திலேயே துடிதுடித்து பரிதாபமாக இறந்தான். இதை பார்த்ததும் டிரைவர் மினிலாரியை நிறுத்திவிட்டு தப்பி ஓடிவிட்டார்.

இதுகுறித்து தகவல் அறிந்ததும் புளியரை போலீசார் சம்பவ இடத்திற்கு விரைந்து வந்தனர்.

முகிலனின் உடலை மீட்டு பிரேத பரிசோதனைக்காக செங்கோட்டை அரசு ஆஸ்பத்திரிக்கு அனுப்பி வைத்தனர்.

போலீசார் வழக்குப்பதிவு செய்து தப்பி ஓடிய மினிலாரி டிரைவரை தேடி வருகின்றனர். பள்ளிக்கூடம் முடிந்து வீட்டுக்கு திரும்பிய சிறுவன், மினி லாரி மோதி இறந்து கிடந்ததை பார்த்து சக மாணவ-மாணவிகள் மற்றும் ஆசிரியர்கள் கண்ணீர் விட்டு அழுதனர்.மேலும் இச்சம்பவம் பற்றி அறிந்ததும் மாணவனின் பெற்றோர் பதறி அடித்துக் கொண்டு ஆஸ்பத்திரிக்கு வந்தனர். மகனின் உடலை பார்த்து அவர்கள் கதறி அழுதனர். மினி லாரி மோதி, பள்ளிக்கூட மாணவன் பலியான சம்பவம் அப்பகுதியில் பெரும் சோகத்தை ஏற்படுத்தி உள்ளது.