விளாத்திகுளம் அருகே மாட்டு வண்டி போட்டி

விளாத்திகுளம், 

விளாத்திகுளம் அருகே மாட்டு வண்டி போட்டி நடந்தது.

மாட்டு வண்டி போட்டி

வீரபாண்டிய கட்டபொம்மன் பிறந்த நாளை முன்னிட்டு, விளாத்திகுளம் அருகே சிங்கிலிபட்டி கல்குமி கிராமத்தில் மாட்டு வண்டி போட்டி நேற்று காலையில் நடந்தது. சிங்கிலிபட்டி-விளாத்திகுளம் ரோட்டில் பந்தய தூரம் அமைக்கப்பட்டு இருந்தது. 10 கிலோ மீட்டர் பந்தய தூரம் கொண்ட பெரிய மாட்டு வண்டி போட்டியில் 8 மாட்டு வண்டிகள் கலந்து கொண்டன. இதில் ராமநாதபுரம் மாவட்டம் இலந்தைகுளம் வீரமுனியசாமி மாட்டு வண்டி முதலிடமும், நெல்லை மாவட்டம் வேளாளங்குளம் கண்ணன் மாட்டு வண்டி 2-வது இடமும், சிங்கிலிபட்டி சித்தர் சங்குசாமி மாட்டு வண்டி 3-வது இடமும் பிடித்தது.

பின்னர் 6 கி.மீ. பந்தய தூரம் கொண்ட சிறிய மாட்டு வண்டி போட்டி நடந்தது. இதில் 13 மாட்டு வண்டிகள் கலந்து கொண்டன. இதில் விளாத்திகுளம் அருகே துவரந்தை மணிமேகலை மாட்டு வண்டி முதலிடமும், சிங்கிலிபட்டி அஜித்குமார் மாட்டு வண்டி 2-வது இடமும், கம்பத்துபட்டி பால்பாண்டி மாட்டு வண்டி 3-வது இடமும் பிடித்தது.

பரிசளிப்பு

பின்னர் பரிசளிப்பு விழா நடந்தது. பெரிய மாட்டு வண்டி போட்டியில் வெற்றி பெற்ற மாட்டு வண்டி உரிமையாளர்களுக்கு முதல் பரிசாக ரூ.15 ஆயிரத்து 260, 2-வது பரிசாக ரூ.13 ஆயிரத்து 260, 3-வது பரிசாக ரூ.11 ஆயிரத்து 260 வழங்கப்பட்டது.

சிறிய மாட்டு வண்டி போட்டியில் வெற்றி பெற்ற மாட்டு வண்டி உரிமையாளர்களுக்கு முதல் பரிசாக ரூ.10 ஆயிரத்து 260, 2-வது பரிசாக ரூ.8 ஆயிரத்து 260, 3-வது பரிசாக ரூ.6 ஆயிரத்து 260 வழங்கப்பட்டது.