உளுந்தூர்பேட்டை அருகே லாரி மீது கார் மோதல்; வாலிபர் பலி

உளுந்தூர்பேட்டை,

உளுந்தூர்பேட்டை பிள்ளையார்கோவில் தெருவை சேர்ந்தவர் குமார் மகன் அரவிந்த்(வயது 21). இவர் தனது நண்பர்களான வெள்ளையூர் கிராமத்தை சேர்ந்த குகன்(26), அருண்பாண்டியன்(22), அறிவழகன்(27), சேந்தன்(29) ஆகியோருடன் ஒரு காரில் விழுப்புரத்தில் உள்ள தனியார் மருத்துவமனைக்கு சென்று கொண்டிருந்தார். காரை குகன் ஓட்டினார். இவர்களது கார் உளுந்தூர்பேட்டை அடுத்த ஆர்.ஆர்.குப்பம் அருகே சென்று கொண்டிருந்த போது முன்னாள் சென்ற பஸ்சை குகன் முந்திச்செல்ல முயன்றார். அப்போது எதிரே வந்த லாரி மீது எதிர்பாராதவிதமாக கார் மோதியது.

இதில் அரவிந்த் சம்பவ இடத்திலேயே பரிதாபமாக உயிரிழந்தார். குகன் உள்பட 4 பேர் படுகாயமடைந்தனர். இவர்களை அக்கம்பக்கத்தினர் மீட்டு சிகிச்சைக்காக உளுந்தூர்பேட்டை அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இதற்கிடையே இதுபற்றி அறிந்த உளுந்தூர்பேட்டை போலீசார் சம்பவ இடத்துக்கு விரைந்து வந்து விபத்தில் பலியான அரவிந்தின் உடலை கைப்பற்றி பிரேத பரிசோதனைக்காக உளுந்தூர்பேட்டை அரசு மருத்துவமனைக்கு அனுப்பி வைத்தனர். மேலும் இதுகுறித்த புகாரின்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.