புதுமைப்பள்ளி விருதுக்கு விண்ணப்பிக்கலாம் 28-ந் தேதி கடைசிநாள்

கோவை,

தமிழகத்தில் உள்ள அரசு பள்ளிகளில் மாணவர் சேர்க்கை அதிகரிப்பு, கற்றல் திறன் மேம்பாடு, கற்பித்தலில் புதுமை, அடிப்படை வசதிகள் என புதுமையான விதத்தில் செயல்படும் பள்ளிகளுக்கு புதுமைப்பள்ளி விருது வழங்கப்படுகிறது. அதில் ஒவ்வொரு மாவட்டத்திலும் ஒரு தொடக்கப்பள்ளி, நடுநிலைப்பள்ளி, உயர்நிலைப்பள்ளி, மேல்நிலைப்பள்ளி என 4 பள்ளிகளுக்கு இந்த விருது வழங்கப்படும்.

விருதுக்கு தேர்வு செய்யப்படும் தொடக்க, நடுநிலைப்பள்ளிகளுக்கு தலா ரூ.1 லட்சமும், உயர்நிலை, மேல்நிலைப்பள்ளிகளுக்கு தலா ரூ.2 லட்சமும் வழங்கப்படும். தமிழகம் முழுவதும் மொத்தம் 128 பள்ளிகளுக்கு இந்த விருதுகள் வழங்கப்பட உள்ளன.

இதன் மூலம் மாவட்டத்தில் உள்ள பள்ளிகளுக்கிடையே ஆரோக்கியமான போட்டி ஏற்பட்டு அரசு பள்ளிகளில் மாணவர் சேர்க்கை அதிகரிக்கும். கற்றல் திறனை மேம்படுத்த உதவும். புதுமையான கற்பித்தல் முறைகளை பின்பற்ற ஆசிரியர்களிடம் ஊக்கம் ஏற்படும். பள்ளிகளின் அனைத்து வகை கட்டமைப்பு வசதிகளான சுற்றுச்சூழல், தூய்மை, கட்டிட வசதி, குடிநீர்-கழிப்பறை வசதிகள் நிறைவு செய்யப்படும்.

புதுமைப்பள்ளி விருதுக்காக பள்ளிகளை தேர்வு செய்ய மாநில அளவில் ஒரு தேர்வுக்குழு அமைக்கப்பட்டு உள்ளது. பள்ளிக்கல்வி இயக்குனர் இதன் தலைவராகவும், தொடக்கக் கல்வி இயக்குனர், மாநில கல்வியியல் ஆராய்ச்சி மற்றும் பயிற்சி நிறுவன இயக்குனர், அனைவருக்கும் இடைநிலை கல்வி திட்டத்தின் மாநில திட்ட இயக்குனர் ஆகியோர் உறுப்பினர்களாகவும், பள்ளி கல்வி இணை இயக்குனர் (இடைநிலை) உறுப்பினர் செயலராகவும் செயல்படுவர். மாநில தேர்வு குழுவுக்கு பள்ளிகளை தேர்வு செய்து பரிந்துரை செய்ய மாவட்ட அளவில் முதன்மைக் கல்வி அதிகாரி தலைமையில் ஒரு தேர்வுக்குழு அமைக்கப்பட்டு உள்ளது.

விருதுக்காக பள்ளிகளை தேர்வுசெய்யும்போது, சுத்திகரிக்கப்பட்ட குடிநீர் வசதி, நவீன கழிப்பறைகள், கற்கும் சூழலை மேம்படுத்த வகுப்பறைகளுக்கு வண்ணம் தீட்டுதல், ஆங்கில பேச்சு பயிற்சி, யோகா பயிற்சி, கணினிவழி கற்றல் முறை, நூலக வசதி, விளையாட்டு போட்டிகளில் அனைத்து மாணவர்களையும் பங்கு கொள்ள செய்தல், தேசிய மாணவர் படை, நாட்டு நலப்பணி திட்டம் ஆகிய அம்சங்கள் இருத்தல் வேண்டும். அத்துடன், பள்ளிக்கு மாணவர்களின் வருகை 90 சதவீதத்துக்கும் மேல் இருத்தல் அவசியம்.

இந்த விருதுகளுக்கு அரசு பள்ளிகள் அந்தந்த மாவட்ட கல்வி அலுவலகங்களில் வருகிற 28-ந் தேதி வரை விண்ணப்பிக்கலாம். இதையடுத்து சம்பந்தப்பட்ட பள்ளிகளில் கல்வித்துறை அதிகாரிகள் தலைமையிலான தேர்வு குழுவினர் ஆய்வு செய்து மதிப்பெண்கள் வழங்குவர். இதை தொடர்ந்து மாவட்ட தேர்வு குழுவினர் மாநில தேர்வு குழுவினருக்கு பரிந்துரைகளை அனுப்புவார்கள். பின்னர் இறுதி பட்டியல் தயார் செய்யப்பட்டு விருதுக்குரிய பள்ளிகளின் பட்டியல் வெளியிடப்படும். இவ்வாறு அவர்கள் தெரிவித்தனர்.