கெலமங்கலம் அருகே டிராக்டர் சக்கரத்தில் சிக்கி டிரைவர் பலி போலீசார் விசாரணை

ராயக்கோட்டை, 

கிருஷ்ணகிரி மாவட்டம் கெலமங்கலம் அருகே உள்ள பி.தம்மண்டரபள்ளியை சேர்ந்தவர் சந்திரப்பா (வயது 33). இவர் சொந்தமாக டிராக்டர் வைத்து ஓட்டி வருகிறார். இந்த நிலையில் சம்பவத்தன்று அதே பகுதியை சேர்ந்த ஒரு விவசாய நிலத்தில் டிராக்டர் மூலம் உழவு பணியில் சந்திரப்பா ஈடுபட்டு கொண்டிருந்தார்.

அப்போது எதிர்பாராதவிதமாக அவர் டிராக்டரில் இருந்து தவறி கீழே விழுந்தார். அந்த நேரம் டிராக்டர் சக்கரம் அவர் மீது ஏறி இறங்கியது. இதில், உடல் நசுங்கிய சந்திரப்பா சம்பவ இடத்திலேயே பரிதாபமாக உயிரிழந்தார்.

இது குறித்து கெலமங்கலம் போலீசாருக்கு தகவல் தெரிவிக்கப்பட்டது. அதன்பேரில் போலீசார் சம்பவ இடத்திற்கு விரைந்து சென்று சந்திரப்பாவின் உடலை கைப்பற்றி பிரேத பரிசோதனைக்காக தேன்கனிக்கோட்டை அரசு ஆஸ்பத்திரிக்கு அனுப்பி வைத்தனர். இந்த சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர். இறந்த சந்திரப்பாவுக்கு மனைவியும், ஒரு மகன் மற்றும் மகள் உள்ளனர்.