மதுபிரியர்கள் வீட்டுக்கு சென்று குடிக்க வேண்டும் : மந்திரி சந்திரசேகர் பவன்குலே பேட்டி

மும்பை,

மராட்டிய கலால்துறை மந்திரி சந்திரசேகர் பவன்குலே மும்பையில் நிருபர்களிடம் கூறியதாவது:-

மராட்டியத்தில், உள்நாட்டில் உற்பத்தி செய்யப்படும் மதுவகைகளை விற்பனை செய்யும் கடைகள் சி.எல்.3 என்றும், வெளிநாட்டு மதுவகைகளை விற்பனை செய்யும் கடைகள் எப்.எல்.2 என்றும் அழைக்கப்படுகிறது.

அதன்படி உள்நாட்டு மது விற்பனை கடைகள் 3 ஆயிரத்து 903 உள்ளன. வெளிநாட்டு மதுவகைகள் விற்பனை செய்யும் கடைகள் 1,685 உள்ளன. உள்நாட்டு மது விற்பனை கடைகளால் பல பிரச்சினைகள் ஏற்படுகின்றன. அங்கேயே குடித்து விட்டு ரகளை செய்கிறார்கள். சட்டம்-ஒழுங்கு பிரச்சினை ஏற்படுகிறது. குடித்து விட்டு வீட்டுக்கு செல்லும் வழியில் விபத்து ஏற்படுகிறது.

இதையெல்லாம் தவிர்க்க உள்நாட்டு மதுபானம் விற்கும் கடைகளை, வெளிநாட்டு மது விற்கும் கடைகளாக மாற்றிக்கொள்ள லைசென்சு வழங்க அரசு முடிவு செய்துள்ளது. இவ்வாறு லைசென்சு மாற்றிக்கொள்ளும் கடைகளில் உள்நாட்டு மதுபானங்களையும், வெளிநாட்டு மதுபானங்களையும் விற்கலாம். ஆனால் அங்கு வைத்து குடிக்க அனுமதி கிடையாது. மதுபாட்டில்களை வீட்டுக்கு எடுத்து சென்று விட வேண்டும். இதனால் விபத்து, சட்டம்-ஒழுங்கு பிரச்சினை தவிர்க்கப்படும்.

இவ்வாறு மந்திரி சந்திரசேகர் பவன்குலே கூறினார்.