எல்லை தாண்டி வந்து மீன் பிடித்ததாக கூறி ராமேசுவரம் மீனவர்கள் 11 பேர் சிறைபிடிப்பு

ராமேசுவரம்,

ராமேசுவரத்தில் இருந்து நேற்று முன் தினம் 500–க்கும் மேற்பட்ட விசைப்படகுகளில் 3,000–க்கும் அதிகமான மீனவர்கள் கடலுக்கு மீன்பிடிக்க சென்றனர். இவர்கள் நடுக்கடலில் மீன்பிடித்துக் கொண்டிருந்தபோது அந்த வழியாக குட்டி கப்பல்களில் ரோந்து வந்த இலங்கை கடற்படையினர் தமிழக மீனவர்களை கண்டதும் அங்கிருந்து செல்லும்படி எச்சரித்துள்ளனர்.

இதையடுத்து மீனவர்கள் படகை எடுத்துக்கொண்டு கரை திரும்ப முயன்றனர். ஆனால் அதற்குள் ஒரு சில படகுகளை சுற்றி வளைத்த இலங்கை கடற்படையினர் அதில் இருந்த மீனவர்களை தாக்கியதுடன், வலைகள் உள்ளிட்ட மீன்பிடி சாதனங்களை சேதப்படுத்தி கடலில் வீசி எறிந்ததாகவும் கூறப்படுகிறது.

மேலும் எல்லை தாண்டி மீன்பிடித்ததாக கூறி ராமேசுவரத்தை சேர்ந்த முருகேசன் என்பவருக்கு சொந்தமான படகையும், அதில் இருந்த மீனவர்கள் இருளப்பன், பால்ராஜ், ராமநாதன், பூமிநாதன் ஆகிய 4 பேரையும், இதேபோல தங்கச்சிமடம் ஜோஸ்வா என்பவருக்கு சொந்தமான படகு மற்றும் அதில் இருந்த மீனவர்கள் கெபிராஜ் (வயது 45), செல்வம்(35), முருகன் (38), பிரசிடன் (30), நாகராஜன் (38), சூழியால் (40), ராஜ் (35) ஆகிய 7 பேரையும் சிறைபிடித்துச்சென்றனர்.

இவ்வாறு சிறைபிடிக்கப்பட்ட 2 படகுகளும், அதில் இருந்த 11 மீனவர்களும் காங்கேசன் துறைமுகத்துக்கு கொண்டு செல்லப்பட்டு அங்கு அவர்களிடம் விசாரணை நடத்தி வருகின்றனர்.