புளியங்குடி அருகே லாரி- மோட்டார் சைக்கிள் மோதல்; இளம்பெண் சாவு குழந்தைகள் உள்பட 3 பேர் காயம்

வாசுதேவநல்லூர்,

நெல்லை மாவட்டம் சிவகிரி ஜீவா தெருவை சேர்ந்தவர் மாரியப்பன் (வயது 32). கூலி தொழிலாளி. இவருடைய மனைவி பிச்சம்மாள் (வயது 25). இவர்களுக்கு 2 மகன்கள், 1 மகள் உள்ளனர். நேற்று முன்தினம் இரவு மாரியப்பன், பிச்சம்மாள், அரிகரசுதன் (3½), நளினி (2) ஆகிய 4 பேரும் ஒரு மோட்டார் சைக்கிளில் புளியங்குடியில் உள்ள உறவினர் வீட்டு துக்க நிகழ்ச்சிக்கு சென்றனர். பின்னர் அங்கிருந்து இரவு அதே மோட்டார் சைக்கிளில் சிவகிரிக்கு புறப்பட்டனர். புளியங்குடி கருப்பையாறு பாலம் அருகே சென்றபோது அந்த பகுதியில் மதுரையில் இருந்து கேரளாவுக்கு சென்ற மீன் லாரி எதிர்பாராதவிதமாக, மாரியப்பன் ஓட்டி வந்த மோட்டார் சைக்கிள் மீது மோதியது. இதில் மாரியப்பன் உள்பட 4 பேரும் கீழே விழுந்தனர். பிச்சம்மாள் பலத்த காயமடைந்து உயிருக்கு போராடிக் கொண்டிருந்தார். மற்ற 3 பேரும் லேசான காயமடைந்தனர்.

உடனே அருகில் இருந்தவர்கள் 4 பேரையும் மீட்டு சிகிச்சைக்காக புளியங்குடி அரசு ஆஸ்பத்திரிக்கு அனுப்பி வைத்தனர். ஆனால் ஆஸ்பத்திரிக்கு செல்லும் வழியிலேயே பிச்சம்மாள் பரிதாபமாக உயிரிழந்தார். மற்ற 3 பேரும் ஆஸ்பத்திரியில் சிகிச்சைக்காக சேர்க்கப்பட்டனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது.

இதுகுறித்து வாசுதேவநல்லூர் போலீசார் வழக்குப்பதிவு செய்து, லாரி டிரைவர் ஸ்ரீவில்லிபுத்தூர் அருகே உள்ள கிருஷ்ணாபுரத்தை சேர்ந்த மாரிமலை என்ற மாரி (30) என்பவரிடம் விசாரணை நடத்தி வருகின்றனர்.