தென்காசி அருகே பயங்கரம்: சொத்து தகராறில் பெண் வெட்டிக் கொலை தொழிலாளிக்கு வலைவீச்சு

தென்காசி, 

தென்காசி அருகே சொத்து தகராறில் பெண் வெட்டிக் கொலை செய்யப்பட்டார். இதுதொடர்பாக தொழிலாளியை போலீசார் வலைவீசி தேடி வருகின்றனர்.

காய்கறி வியாபாரம்

நெல்லை மாவட்டம் தென்காசி தாலுகா ஆயிரப்பேரி அருகே உள்ள பாட்டப்பத்து ஊரைச் சேர்ந்தவர் சிதம்பரம் (வயது 65). அவருடைய மனைவி கோமு (60). இவர்கள் இருவரும் தென்காசி தினசரி சந்தையில் காய்கறி வியாபாரம் செய்து வருகின்றனர்.

சிதம்பரத்துக்கும், அவருடைய அண்ணன் கணேசன் என்பவருக்கும் இடையே சொத்து தகராறு ஏற்பட்டு முன்விரோதம் இருந்து வந்ததாக கூறப்படுகிறது. இதுதொடர்பாக கணேசனின் மகன் தொழிலாளியான கண்ணன் என்பவர் தனது சித்தப்பாவான சிதம்பரத்திடம் அடிக்கடி சொத்துகளை கேட்டு வந்ததாகவும் தெரிகிறது. ஆனால் அவர் கொடுக்க மறுத்து வந்தார்.

வெட்டிக் கொலை

இந்த நிலையில் சிதம்பரம், கோமு ஆகிய இருவரும் நேற்று வியாபாரத்தை முடித்துக் கொண்டு, இரவு 7 மணி அளவில் ஆசாத்நகர் காட்டுப்பாதை வழியாக வந்து கொண்டிருந்தனர். அப்போது எதிரே வந்த கண்ணன், அவர்களிடம் சொத்துகளை கேட்டு தகராறு செய்துள்ளார்.

இதனால் அவர்களுக்கு இடையே ஏற்பட்ட தகராறில் ஆத்திரம் அடைந்த கண்ணன், தான் மறைத்து வைத்திருந்த அரிவாளால் 2 பேரையும் சரமாரியாக வெட்டியதாக கூறப்படுகிறது. பின்னர் கண்ணன் அங்கிருந்து தப்பிச் சென்றுவிட்டார். இதில் கோமு சம்பவ இடத்திலேயே இறந்தார். சிதம்பரம் பலத்த காயம் அடைந்து உயிருக்கு போராடிய நிலையில் கிடந்தார்.

தொழிலாளிக்கு வலைவீச்சு

இதுகுறித்து தகவல் அறிந்ததும் குற்றாலம் போலீசார் சம்பவ இடத்துக்கு விரைந்து சென்றனர். கோமு உடலை கைப்பற்றி பரிசோதனைக்காக தென்காசி அரசு ஆஸ்பத்திரிக்கு அனுப்பி வைத்தனர். சிதம்பரத்தையும் மீட்டு ஆஸ்பத்திரிக்கு கொண்டு சென்றனர்.

பின்னர் அங்கிருந்து மேல் சிகிச்சைக்காக சிதம்பரம் பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. இதுபற்றி குற்றாலம் போலீஸ் இன்ஸ்பெக்டர் சுரேஷ் வழக்குப்பதிவு செய்து, கண்ணனை வலைவீசி தேடி வருகிறார். சொத்து தகராறில் பெண் வெட்டிக் கொலை செய்யப்பட்ட சம்பவம் அந்த பகுதியில் பரபரப்பை ஏற்படுத்தி உள்ளது.