மோட்டார் சைக்கிள்கள் மோதல்: அண்ணன்-தங்கை உள்பட 3 பேர் படுகாயம்

கூத்தாநல்லூர்,

கூத்தாநல்லூர் அருகே உள்ள வடபாதிமங்கலம் குலமாணிக்கம் தெருவை சேர்ந்தவர் மகேந்திரன் (வயது 29) கூலி தொழிலாளி. சம்பவத்தன்று இவர், தனது தங்கை கனகாவை (24) மோட்டார் சைக்கிளில் திருவாரூருக்கு அழைத்து சென்று விட்டு பின்னர் குலமாணிக்கத்தை நோக்கி வந்து கொண்டிருந்தார். அப்போது வடபாதிமங்கலம்-கோட்டூர் சாலையில் உச்சுவாடி என்ற இடத்தில் சென்றபோது எதிரே குலமாணிக்கத்தை சேர்ந்த அருண்குமார் (27) என்பவர் ஓட்டி வந்த மோட்டார் சைக்கிளும், மகேந்திரன் ஓட்டி வந்த மோட்டார் சைக்கிளும் நேருக்கு நேர் மோதி கொண்டது.

இதில் மகேந்திரன், கனகா, அருண்குமார் ஆகிய 3 பேரும் படுகாயம் அடைந்தனர். உடனடியாக அவர்கள் 3 பேரையும் அக்கம் பக்கத்தினர் மீட்டு திருவாரூர் அரசு மருத்துவக்கல்லூரி மருத்துவமனையில் சேர்த்தனர். அங்கு அவர்கள் சிகிச்சை பெற்று வருகின்றனர்.

இதுகுறித்த புகாரின் பேரில் வடபாதிமங்கலம் போலீசார் வழக்குப்பதிவு செய்து விசாரணை நடத்தி வருகின்றனர்.