இலங்கை குண்டுவெடிப்பு எதிரொலி: திண்டுக்கல் ரெயில் நிலையத்தில் போலீசார் தீவிர சோதனை

திண்டுக்கல்,

கடந்த சில நாட்களுக்கு முன்பு ஈஸ்டர் பண்டிகையன்று இலங்கையில் தொடர் குண்டுவெடிப்பு நடந்தது. இதில் ஏராளமானவர்கள் பலியானார்கள். மேலும் சில இடங்களில் வெடிகுண்டுகள் கண்டெடுக்கப்பட்டன. இந்த சம்பவத்தின் எதிரொலியாக தமிழகத்திலும் பாதுகாப்பு ஏற்பாடுகள் தீவிரப்படுத்தப்பட்டுள்ளது.


இதனையடுத்து தமிழகம் முழுவதும் உள்ள பஸ்நிலையங்கள், பொதுமக்கள் கூடும் இடங்கள் மற்றும் ரெயில் நிலையங்கள் என அனைத்து இடங்களிலும் பாதுகாப்பு ஏற்பாடுகள் பலப்படுத்தப்பட்டுள்ளது.

அதன்படி திண்டுக்கல் ரெயில் நிலையத்தில் வெடிகுண்டுகள் உள்ளதா என ‘மெட்டல் டிடெக்டர்‘ கருவியை கொண்டு ரெயில்வே போலீசார் தீவிர சோதனை நடத்தி வருகின்றனர். நேற்று திண்டுக்கல் ரெயில் நிலையத்தில் நெல்லை- ஈரோடு பயணிகள் ரெயிலில் வந்த பயணிகள் மற்றும் அவர்களின் உடைமைகளை ‘மெட்டல் டிடெக்டர்‘ கருவி மூலம் சோதனை செய்தனர். திண்டுக்கல் ரெயில்வே போலீஸ் இன்ஸ்பெக்டர் கீதாதேவி தலைமையில் போலீசார் சோதனையில் ஈடுபட்டனர்.