விளையாட்டு விடுதிகளில் மாணவர்கள் சேர்க்கைக்கான தேர்வு 8-ந் தேதி நடக்கிறது

பெரம்பலூர்,

தமிழ்நாடு விளையாட்டு மேம்பாட்டு ஆணையத்தின் கீழ் பள்ளிகளில் பயிலும் மாணவ- மாணவிகளுக்கு விளையாட்டு துறையில் சாதனைகள் புரிவதற்கு ஏற்ப நல்ல பயிற்சி, தங்கும் இட வசதி மற்றும் சத்தான உணவுடன் கூடிய விளையாட்டு விடுதிகள் மற்றும் விளையாட்டு பள்ளிகள் சிறப்பாக செயல்பட்டு வருகின்றன. மாணவர்களுக்கான விளையாட்டு விடுதிகள் மதுரை, திருச்சி, நெல்லை, கிருஷ்ணகிரி, கோவை, கடலூர், தஞ்சாவூர், அரியலூர், தூத்துக்குடி, சிவகங்கை, தேனி, ராமநாதபுரம், ஊட்டி, விழுப்புரம், சென்னை, நெய்வேலி மற்றும் நாமக்கல் ஆகிய இடங்களில் செயல்பட்டு வருகின்றன.

மாணவிகளுக்கான விளையாட்டு விடுதிகள் ஈரோடு, திருவண்ணாமலை, நாமக்கல், திண்டுக்கல், நாகர்கோவில், பெரம்பலூர், தேனி, புதுக்கோட்டை, தர்மபுரி மற்றும் சென்னை ஆகிய இடங்களில் செயல்பட்டு வருகின்றன. இதில் பெரம்பலூர் மாவட்ட விளையாட்டு விடுதிகளில் சேர்வதற்கான மாவட்ட அளவிலான தேர்வு வருகிற மே மாதம் 8-ந் தேதி பெரம்பலூர் எம்.ஜி.ஆர். விளையாட்டு வளாகத்தில் நடைபெற உள்ளது.

7-ந் தேதி மாலை 5 மணிக்குள்...

இதில் 7, 8, 9, 11,-ம் வகுப்பு மாணவர்களுக்கு தடகளப்போட்டிகள், இறகுப்பந்து, கூடைப்பந்து, குத்துச்சண்டை, கிரிக்கெட், கால்பந்து, வாள்சண்டை, ஜிம்னாஸ்டிக்ஸ், ஹேண்ட்பால், வளைகோல்பந்து, நீச்சல், டேக்வாண்டோ, வாலிபால், பளுதுாக்குதல், கபடி, மேஜைப்பந்து, டென்னிஸ், ஜீடோ, ஸ்குவாஷ், வில்வித்தை ஆகியவைக்கும், மாணவிகளுக்கு தடகளப்போட்டிகள், இறகுப்பந்து, கூடைப்பந்து, குத்துச்சண்டை, கால்பந்து, வாள்சண்டை, கைப்பந்து, வளைகோல்பந்து, நீச்சல், டேக்வாண்டோ, வாலிபால், பளுதூக்குதல், கபடி, டென்னிஸ், ஜீடோ, ஸ்குவாஷ் ஆகியவைக்கும் தேர்வு நடைபெறும்.

மாவட்ட, மா நில மற்றும் தேசிய அளவில் வெற்றி பெற்ற மாணவர்களுக்கு முன்னுரிமை வழங்கப்படும். விளையாட்டில் சிறந்து விளங்கும் மற்றும் ஆர்வம் கொண்டுள்ள மாணவ- மாணவிகள் அதற்கான உரிய படிவங்களை www.sdat.tn.gov.in என்ற இணையதள முகவரி மூலம் பெற்று பூர்த்தி செய்து வருகிற 7-ந் தேதி மாலை 5 மணிக்குள் சமர்ப்பிக்க வேண்டும். இந்த தகவலை பெரம்பலூர் மாவட்ட கலெக்டர் சாந்தா வெளியிட்டுள்ள செய்திக்குறிப்பில் தெரிவித்துள்ளார்.