செங்கோட்டை அருகே போலீஸ்காரர் மீது தாக்குதல்; 3 பேர் கைது

அச்சன்புதூர், 

நெல்லை மாவட்டம் செங்கோட்டை அருகே உள்ள இலத்தூர் போலீஸ் நிலையத்தில் போலீஸ்காரராக பணியாற்றி வருபவர் வீரமணிகண்டன். இவர் நேற்று முன்தினம் இரவு சீவநல்லூர் பகுதியில் ரோந்து பணியில் ஈடுபட்டிருந்தார். அப்போது அங்கு உள்ள ஒரு கடையில் சாப்பிட சென்றுள்ளார்.

அப்போது அங்கு வந்த இலத்தூர் சுண்டக்காட்டு தெருவை சேர்ந்த சுப்பிரமணியன் (வயது 43), முத்தையா (39), சிவகுமார் மற்றும் பிரம்மநாயகம் மகன் மாணிக்கம்(23) ஆகியோர் சாப்பிட்டு கொண்டு இருந்த வீரமணிகண்டனிடம் தகராறில் ஈடுபட்டனர். தொடர்ந்து அவர் கள் வீரமணிகண்டன் மோட்டார்சைக்கிளில் இருந்த லத்தியை எடுத்து அவரை சரமாரியாக தாக்கியதாக கூறப்படுகிறது. இதில் பலத்த காயமடைந்த வீரமணிகண்டன், தென்காசி அரசு ஆஸ்பத்திரியில் சிகிச்சை பெற்று வருகிறார்.

இதுகுறித்து வீரமணிகண்டன் அளித்த புகாரின்பேரில் இலத்தூர் போலீசார் வழக்குப்பதிவு செய்து சுப்பிரமணியன், முத்தையா, மாணிக்கம் ஆகிய 3 பேரையும் கைது செய்தனர். தப்பி ஓடிய சிவகுமாரை போலீசார் வலைவீசி தேடி வருகின்றனர்.