சென்னையில் உள்ள சிறப்பு விளையாட்டு விடுதியில் சேர பிளஸ்-2 தேர்ச்சி பெற்ற மாணவர்கள் விண்ணப்பிக்கலாம் அதிகாரி தகவல்

கிருஷ்ணகிரி, 

இது குறித்து கிருஷ்ணகிரி மாவட்ட விளையாட்டு மற்றும் இளைஞர் நலன் அலுவலர் சிவரஞ்சன் வெளியிட்டுள்ள செய்திக்குறிப்பில் கூறியிருப்பதாவது:-

தமிழக அரசின் இளைஞர் நலன் மற்றும் விளையாட்டு மேம்பாட்டு துறையின் கீழ் கல்லூரி மாணவ, மாணவிகள் விளையாட்டு துறையில் சாதனைகள் படைப்பதற்கு ஏற்ப விஞ்ஞான ரீதியான பயிற்சி, தங்குமிட வசதி மற்றும் சத்தான உணவுடன் கூடிய சிறப்பு விளையாட்டு விடுதிகள் தமிழ்நாடு விளையாட்டு மேம்பாட்டு ஆணையத்தின் மூலம் செயல்படுத்தப்பட்டு வருகின்றன. அதன்படி மாணவர்களுக்கான விளையாட்டு விடுதி சென்னை ஜவஹர்லால் நேரு விளையாட்டு அரங்கிலும், மாணவிகளுக்கான விடுதி சென்னை நேரு உள் விளையாட்டு அரங்கிலும் செயல்படுகிறது.

மாணவர்களுக்கு இங்கு தடகளம், கூடைப்பந்து, குத்துச்சண்டை, கையுந்து பந்து, பளுதூக்குதல், வாள்சண்டை, இறகுபந்து, ஜூடோ மற்றும் துப்பாக்கி சுடுதல் ஆகிய விளையாட்டுகளிலும், மாணவிகளுக்கு தடகளம், குத்துச்சண்டை, கால்பந்து, பளுதூக்குதல் மற்றும் ஜூடோ ஆகிய விளையாட்டுகளிலும் பயிற்சி அளிக்கப்படும்.

இந்த சிறப்பு விளையாட்டு விடுதியில் சேர, பிளஸ்-2 தேர்ச்சி பெற்றிருக்க வேண்டும். தனிப்போட்டிகளில் விண்ணப்பிப்பவர்கள் மாநில அளவில் குடியரசு, பாரதியார் தின விளையாட்டு போட்டிகள், அங்கீகரிக்கப்பட்ட மாநில விளையாட்டு கழகங்கள் நடத்திய போட்டிகளில் முதல் மூன்று இடங்களில் வெற்றி பெற்றிருக்க வேண்டும். அல்லது தமிழ்நாடு அணியில் தேர்வு செய்யப்பட்டு, தேசிய அளவில் தேசிய விளையாட்டு சம்மேளனங்கள், இந்திய பள்ளி விளையாட்டு கூட்டமைப்பு, மத்திய இளைஞர் நலன் மற்றும் விளையாட்டு அமைச்சகம் நடத்திய போட்டிகளில் கலந்து கொண்டவர்களும் விண்ணப்பிக்கலாம்.

குழு போட்டிகளில் விண்ணப்பிப்பவர்கள் மாநில அளவில் குடியரசு, பாரதியார் தின விளையாட்டு போட்டிகள், மாநில விளையாட்டு கழகங்கள் நடத்தும் போட்டிகளில் முதல் இரண்டு இடங்களில் வெற்றி பெற்றிருத்தல் வேண்டும். அல்லது தமிழ்நாடு அணியில் தேர்வு செய்யப்பட்டு, தேசிய அளவில் தேசிய விளையாட்டு சம்மேளனங்கள், இந்திய பள்ளி விளையாட்டு கூட்டமைப்பு, மத்திய இளைஞர் நலன் மற்றும் விளையாட்டு அமைச்சகம் நடத்தும் போட்டிகளில் கலந்து கொண்டவர்களும் விண்ணப்பிக்கலாம்.

எனவே, விளையாட்டில் சிறந்து விளங்கும் மற்றும் ஆர்வமுள்ள மாணவ, மாணவிகள் அதற்கான ஆன்லைன் விண்ணப்ப படிவம் www.sdat.tn.gov.in என்ற இணையதள முகவரியில் வருகிற 2-ந் தேதி மாலை 5 மணிக்குள் சமர்ப்பிக்க வேண்டும். மேலும் இந்த சிறப்பு விளையாட்டு விடுதியில் சேர விரும்பும் மாணவ, மாணவிகளுக்கான மாநில அளவிலான தேர்வு போட்டிகள் வருகிற 3-ந் தேதி காலை 8 மணிக்கு சென்னை ஜவஹர்லால் நேரு விளையாட்டு அரங்கத்தில் தடகளம், குத்துச்சண்டை, கையுந்துபந்து, பளுதூக்குதல், ஜுடோ (ஆண், பெண்), ஆண்களுக்கான வாள் சண்டை, துப்பாக்கி சுடுதல், பெண்களுக்கான கால்பந்து போட்டிக்கு விண்ணப்பிப்பவர்கள் நேரில் ஆஜராக வேண்டும்.

இதே போல் சென்னை நேரு உள்விளையாட்டு அரங்கில் ஆண்களுக்கான கூடைப்பந்து, இறகுபந்து போட்டிக்கு விண்ணப்பித்தவர்கள் நேரில் ஆஜராக வேண்டும். இவ்வாறு அதில் கூறப் பட்டுள்ளது.