சிறப்பு விளையாட்டு விடுதியில் சேர மாணவ –மாணவிகள்; விண்ணப்பிக்கலாம் கலெக்டர் தகவல்

ஈரோடு,

ஈரோடு மாவட்ட கலெக்டர் சி.கதிரவன் வெளியிட்டு உள்ள செய்திக்குறிப்பில் தெரிவித்து இருப்பதாவது:–

தமிழக அரசின் இளைஞர் நலன் மற்றும் விளையாட்டு மேம்பாட்டு துறையின் கீழ், கல்லூரிகள் படிக்கும் மாணவ, மாணவிகளுக்கு விளையாட்டு துறையில் சாதனைகள் படைப்பதற்கு ஏற்ப விஞ்ஞான ரீதியான பயிற்சி, தங்கும் இடவசதி மற்றும் சத்தான உணவுடன் கூடிய சிறப்பு விளையாட்டு விடுதிகள் தமிழ்நாடு விளையாட்டு மேம்பாட்டு ஆணையத்தின் மூலமாக செயல்படுத்தப்பட்டு வருகின்றன.

சென்னை ஜவஹர்லால் நேரு விளையாட்டு அரங்கத்தில் மாணவர்களுக்கான விளையாட்டு விடுதியும், சென்னை நேரு உள் விளையாட்டு அரங்கில் மாணவிகளுக்கான விளையாட்டு விடுதியும் செயல்பட்டு வருகிறது. இங்கு பயிற்சி பெற்று சிறந்த விளையாட்டு வீரர்–வீராங்கனைகளாக விளங்குவதற்கு பிளஸ்–2 பொதுத்தேர்வில் தேர்ச்சி பெற்ற மற்றும் படிக்கும் மாணவ –மாணவிகள் தகுதி உடையவர் ஆவார்கள்.

தனிப்போட்டிகளில் விண்ணப்பிப்பவர்கள் மாநில அளவில் குடியரசு, பாரதியார் தின விளையாட்டு போட்டிகள் மற்றும் அங்கீகரிக்கப்பட்ட மாநில விளையாட்டு கழகங்கள் நடத்தும் போட்டிகளில் முதல் 2 இடங்களில் வெற்றி பெற்று இருக்க வேண்டும். அல்லது தமிழ்நாடு அணியில் தேர்வு செய்யப்பட்டு தேசிய அளவில் தேசிய விளையாட்டு சம்மேளனங்கள் மற்றும் இந்திய பள்ளி விளையாட்டு கூட்டமைப்பு மத்திய இளைஞர் நலன் மற்றும் விளையாட்டு அமைச்சகம் நடத்தும் போட்டிகளில் கலந்து கொண்டவர்களும் விண்ணப்பிக்கலாம்.

கையுந்துபந்து விளையாட்டில் 185 சென்டி மீட்டருக்கு மேல் உயரம் உள்ள மாணவ, மாணவிகளுக்கு முன்னுரிமை வழங்கப்படும். 2019–2020–ம் ஆண்டிற்கான சிறப்பு விளையாட்டு விடுதியில் மாணவர்களுக்கு தடகளம், கூடைப்பந்து, குத்துச்சண்டை, கையுந்துபந்து, பளுதூக்குதல், வாள்சண்டை, இறகுபந்து, ஜுடோ, துப்பாக்கிச்சுடுதல் ஆகிய போட்டிகளிலும், மாணவிகளுக்கு தடகளம், குத்துச்சண்டை, கையுந்துபந்து, கால்பந்து, பளுதூக்குதல் ஜுடே ஆகிய போட்டிகளிலும் தேர்வு நடைபெற உள்ளது.

விளையாட்டில் சிறந்து விளங்கும் மற்றும் ஆர்வம் கொண்டுள்ள மாணவ–மாணவிகள் அதற்கான விண்ணப்ப படிவங்களை www.sdat.tn.gov.in என்ற இணையதள முகவரியில் பதிவிறக்கம் செய்து கொள்ளலாம். பூர்த்தி செய்யப்பட்ட விண்ணப்பத்தினை ஆன்லைன் மூலம் நாளை மறுநாள் (வியாழக்கிழமை) மாலை 5 மணிக்குள் சமர்ப்பிக்க வேண்டும். சிறப்பு விளையாட்டு விடுதியில் சேர மாணவ, மாணவிகளுக்கான மாநில அளவிலான தேர்வு வருகிற 3–ந்தேதி நடக்கிறது.

சென்னை ஜவஹர்லால் நேரு விளையாட்டு அரங்கத்தில் மாணவ–மாணவிகளுக்கான தடகளம், குத்துச்சண்டை, கையுந்துபந்து, பளுதூக்குதல், வாள்சண்டை, துப்பாக்கிச்சுடுதல், ஜுடோ ஆகிய போட்டிகளும் மாணவிகளுக்கான கால்பந்து போட்டியும், சென்னை நேரு விளையாட்டு அரங்கத்தில் மாணவர்களுக்கான கூடைப்பந்து போட்டியும், மாணவிகளுக்கான இறகுப்பந்து போட்டியும் நடக்கிறது. இந்த தேர்வு போட்டியில் கலந்து கொள்ளும் மாணவ, மாணவிகள் வருகிற 3–ந்தேதி காலை 8 மணிக்குள் சம்மந்தப்பட்ட மையத்தில் இருக்க வேண்டும்.

இவ்வாறு அந்த செய்திக்குறிப்பில் மாவட்ட கலெக்டர் சி.கதிரவன் தெரிவித்து உள்ளார்.