கோவில்பட்டி அருகே ஆட்டோ கவிழ்ந்து கல்லூரி மாணவர் சாவு

கோவில்பட்டி, 

கோவில்பட்டி அருகே ஆட்டோ கவிழ்ந்து பாலிடெக்னிக் கல்லூரி மாணவர் பரிதாபமாக இறந்தார்.

ஆட்டோ கவிழ்ந்தது

தூத்துக்குடி மாவட்டம் கோவில்பட்டி அருகே உள்ள இளையரசனேந்தல் எம்.ஜி.ஆர். காலனியை சேர்ந்தவர் மாரியப்பன் மகன் மதன்குமார் (வயது 18). இவர் நெல்லை மாவட்டம் சேரன்மாதேவியில் உள்ள பாலிடெக்னிக் கல்லூரியில் படித்து வந்தார்.

நேற்றுமுன்தினம் மதன்குமார், அவருடைய நண்பர்களான அதேபகுதியை சேர்ந்த சஞ்சய் (15), ரமேஷ் (19) மற்றும் வெங்கடாசலபுரத்தை சேர்ந்த மாரிசாமி ஆகிய 4 பேரும், ஒரு ஆட்டோவில் கோவில்பட்டி அருகே கரிசல்குளத்தில் நடந்த கோவில் கொடைவிழாவுக்கு சென்றனர். பின்னர் அதே ஆட்டோவில் ஊருக்கு திரும்பி சென்று கொண்டிருந்தனர்.

ஆட்டோவை இளையரசனேந்தலை சேர்ந்த இன்பராஜ் (20) ஓட்டினார். ஆட்டோ கரிசல்குளம் மாரியம்மன் கோவில் அருகே சென்றபோது நிலைதடுமாறி ரோட்டின் ஓரம் கவிழ்ந்தது. இதில் மதன்குமார், ரமேஷ் ஆகிய 2 பேரும் பலத்த காயமடைந்தனர்.

பரிதாப சாவு

உடனே அருகில் இருந்தவர்கள் 2 பேரையும் மீட்டு சிகிச்சைக்காக கோவில்பட்டி அரசு ஆஸ்பத்திரிக்கு அனுப்பி வைத்தனர். அங்கு மதன்குமாரை பரிசோதனை செய்த டாக்டர்கள் அவர் ஏற்கனவே இறந்துவிட்டதாக தெரிவித்தனர். ரமேசுக்கு சிகிச்சை அளிக்கப்பட்டு வருகிறது. இதுகுறித்த புகாரின்பேரில் கொப்பம்பட்டி போலீசார் வழக்குப்பதிவு விசாரணை நடத்தி வந்தனர். இந்த நிலையில் நேற்று இன்பராஜ் கோவில்பட்டி கோர்ட்டில் சரண் அடைந்தார். பின்னர் அவர் ஜாமீனில் விடுவிக்கப்பட்டார்.