பர்கூர் அருகே பரபரப்பு: பெண் கழுத்தை இறுக்கி கொலை

பர்கூர், 

கிருஷ்ணகிரி மாவட்டம் பர்கூர் அருகே உள்ளது ஒப்பதவாடி கூட்டு ரோடு. கிருஷ்ணகிரி - சென்னை தேசிய நெடுஞ்சாலையில் இந்த பகுதி அமைந்துள்ளது. மாவட்ட எல்லையில் உள்ள இந்த பகுதியில் வனப்பகுதியையொட்டி சாலையோரத்தில் 30 வயது மதிக்கத்தக்க பெண் ஒருவர் பிணமாக கிடந்தார். இதைப் பார்த்து அதிர்ச்சி அடைந்த அந்த வழியாக சென்ற பொதுமக்கள் இதுதொடர்பாக ஒப்பதவாடி கிராம நிர்வாக அலுவலர் பேரரசுக்கு தகவல் தெரிவித்தனர்.

அதன் பேரில் அவர் இதுகுறித்து பர்கூர் போலீஸ் நிலையத்திற்கு தகவல் கொடுத்தார். இந்த தகவலின் பேரில் பர்கூர் போலீஸ் இன்ஸ்பெக்டர் செல்வராஜ், சப்-இன்ஸ்பெக்டர் பச்சமுத்து மற்றும் போலீசார் சம்பவ இடத்திற்கு விரைந்து சென்றனர். பின்னர் அவர்கள் அந்த பெண்ணின் உடலை கைப்பற்றி விசாரணை நடத்தினார்கள்.

இதில் அந்த பெண் கழுத்தை இறுக்கி கொலை செய்யப்பட்டதும், அவரது உடலை மர்ம நபர்கள் காரில் கொண்டு வந்து சாலையோரத்தில் வீசி சென்றதும் தெரிய வந்தது. கொலையுண்ட பெண் கருநீல நிற எம்ப்ராய்டு பூ போட்ட சுடிதாரும், நீல நிற பேண்டும் அணிந்திருந்தார். காலில் கருப்பு கயிறு ஒன்று கட்டி உள்ளார்.

மேலும் கழுத்தில் கருப்பு மணி கட்டி உள்ளார். இறந்தவர் யார்? எந்த ஊரை சேர்ந்தவர்? அவரை கொலை செய்த மர்ம நபர்கள் யார்? என தெரியவில்லை.

இதைத்தொடர்ந்து கொலையுண்ட பெண்ணின் உடலை போலீசார் கைப்பற்றி பிரேத பரிசோதனைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர். மேலும், இது தொடர்பாக பர்கூர் போலீசார் வழக்குப்பதிவு செய்து கொலையுண்ட பெண் யார்? அவரை கொன்று உடலை வீசி சென்ற மர்ம நபர்கள் யார்? என விசாரணை நடத்தி வருகிறார்கள். மர்ம நபர்கள் பெண்ணை கொலை செய்து உடலை சாலையோரத்தில் வீசி சென்ற சம்பவம் பர்கூர் அருகே பரபரப்பை ஏற்படுத்தி உள்ளது.