நெல்லை அருகே வெவ்வேறு விபத்துகளில் பெண் உள்பட 3 பேர் சாவு

நெல்லை, 

நெல்லை மாவட்டம் முக்கூடல் அருகே உள்ள வடக்கு அரியநாயகிபுரத்தை சேர்ந்தவர் மாரியப்பன் (வயது 48). இவர் சம்பவத்தன்று தனது மோட்டார் சைக்கிளில் முன்னீர்பள்ளம் அருகே சென்று கொண்டிருந்தார். அப்போது அந்த பகுதியில் வந்த கார் எதிர்பாராதவிதமாக மாரியப்பன் ஓட்டி சென்ற மோட்டார் சைக்கிள் மீது பயங்கரமாக மோதியது. இதில் மோட்டார் சைக்கிளில் இருந்து தூக்கி வீசப்பட்ட மாரியப்பன் பலத்த காயம் அடைந்தார். உடனே அருகில் இருந்தவர்கள் அவரை மீட்டு சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். ஆனால் அங்கு சிகிச்சை பலனின்றி மாரியப்பன் நேற்று முன்தினம் இரவு பரிதாபமாக உயிரிழந்தார்.

தூத்துக்குடி 3-வது மைல் சங்கர் காலனியை சேர்ந்தவர் சுப்பையா மனைவி அண்ணாமலை அம்மாள் (70). இவர் நேற்று முன்தினம் நெல்லை அருகே உள்ள முன்னீர்பள்ளம் பகுதியில் நடந்து சென்று கொண்டிருந்தார். அப்போது அந்த பகுதியில் வந்த மோட்டார் சைக்கிள் அண்ணாமலை அம்மாள் மீது மோதியது.

இதில் பலத்த காயம் அடைந்த அவர் சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரியில் சேர்க்கப்பட்டார். ஆனால் அங்கு சிகிச்சை பலனின்றி நேற்று காலை அவர் பரிதாபமாக உயிரிழந்தார். இந்த விபத்துகள் குறித்து முன்னீர்பள்ளம் போலீசார் வழக்குப்பதிவு செய்து விசாரணை நடத்தி வருகின்றனர்.

இதேபோல் பாளையங்கோட்டையை அடுத்த தெற்கு அரியகுளத்தை சேர்ந்தவர் கிருஷ்ணன் (65). விவசாயி. இவர் நேற்று காலை அரியகுளத்தில் உள்ள நெல்லை -தூத்துக்குடி நான்கு வழிச்சாலையை கடக்க முயன்றார். அப்போது நெல்லையில் இருந்து தூத்துக்குடி நோக்கி சென்ற கார் எதிர்பாராதவிதமாக கிருஷ்ணன் மீது மோதியது. இதில் அவர் பலத்த காயம் அடைந்தார். உடனே அருகில் இருந்தவர்கள் அவரை மீட்டு சிகிச்சைக்காக ஐகிரவுண்டு அரசு ஆஸ்பத்திரிக்கு அனுப்பி வைத்தனர். ஆனால் செல்லும் வழியிலேயே அவர் பரிதாபமாக உயிரிழந்தார். இதுகுறித்து பாளையங்கோட்டை தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.