ஓட்டப்பிடாரம் அருகே பெண் வெட்டிக்கொலை: கணவரை பிடிக்க 2 தனிப்படைகள் அமைப்பு

ஓட்டப்பிடாரம், 

ஓட்டப்பிடாரம் அருகே பெண்ணை வெட்டிக் கொலை செய்த கணவரை பிடிக்க 2 தனிப்படைகள் அமைக்கப்பட்டு உள்ளன.

ெபண் வெட்டிக் கொலை

ஓட்டப்பிடாரம் அருகே உள்ள எப்போதும் வென்றான் கிழக்கு தெருவை சேர்ந்தவர் பழனிமுருகன் (வயது 43). கார் டிரைவர். இவருடைய மனைவி காசி ராமுத்தாய் (37). இவர்களுக்கு ஷர்மிளா (19) என்ற மகளும், முத்துமகேஷ் (15), தமிழ்செல்வம் (11) என்ற மகன்களும் உள்ளனர். ஷர்மிளா காதல் திருமணம் செய்து கொண்டார். இதனால் பழனிமுருகனுக்கும், காசி ராமுத்தாய்க்கும் அடிக்கடி தகராறு ஏற்பட்டு வந்தது. இந்த நிலையில் சம்பவத்தன்று அதிகாலையில் கணவன், மனைவிக்குள் மீண்டும் தகராறு ஏற்பட்டது. இதனால் ஆத்திரம் அடைந்த பழனிமுருகன், வீட்டில் இருந்த அரிவாளை எடுத்து காசி ராமுத்தாயை வெட்டியதாக கூறப்படுகிறது. இதில் அவர் பரிதாபமாக இறந்தார். பின்னர் பழனிமுருகன் அங்கிருந்து தப்பி சென்று விட்டார்.

2 தனிப்படைகள்

இதுகுறித்து எப்போதும் வென்றான் போலீசார் வழக்குப்பதிவு செய்தனர். இந்த நிலையில், கொலையாளியை பிடிக்க தூத்துக்குடி மாவட்ட போலீஸ் சூப்பிரண்டு முரளிரம்பா உத்தரவின் பேரில் விளாத்திகுளம் துணை சூப்பிரண்டு ஜெயக்குமார் மேற்பார்வையில், எட்டயபுரம் இன்ஸ்பெக்டர் வனசுந்தர் தலைமையில் ஒரு தனிப்படையும், சப்-இன்ஸ்பெக்டர் அருண்ராஜா தலைமையில் ஒரு தனிப்படையும் அமைக்கப்பட்டு உள்ளது. இந்த தனிப்படை போலீசார், தப்பி சென்ற பழனிமுருகனை தீவிரமாக தேடி வருகின்றனர்.