கிரிக்கெட் பந்தை எடுக்கச் சென்ற போது கடலில் மூழ்கிய 2 சிறுவர்கள் பிணமாக மீட்பு - குடும்பத்தினர் கதறல்

மணவாளக்குறிச்சி,

குமரி மாவட்டம் மண்டைக்காடு அருகே புதூர் மீனவ கிராம கடற்கரை பகுதியில் உள்ள ஒரு தென்னந்தோப்பில் கடந்த 16-ந் தேதி அப்பகுதியை சேர்ந்த மிக்கேல் வேதநாயகம் மகன் சச்சின் (வயது 14), ஆன்டணி மகன் ஆன்டோ ரக்‌ஷன் (11), சகாயராஜன் மகன் சகாய ரெஜின்(12), பேட்டர் மகன் ரகீத் (13) உள்பட 10 சிறுவர்கள் கிரிக்கெட் விளையாடினர். அப்போது, கிரிக்கெட் பந்து கடலில் விழுந்தது.

அதை எடுக்க முயன்ற போது சச்சின், ஆன்டோ ரக்‌ஷன், ரகீத், சகாய ரெஜின் ஆகியோரை அலை இழுத்து சென்றது. இவர்களில் சச்சின் பிணமாகவும், ஆன்டோ ரக்‌ஷனை உயிருடனும் மீனவர்கள் மீட்டனர். சகாய ரெஜின், ரகீத் ஆகியோர் அலையால் இழுத்து செல்லப்பட்டு கடலில் மூழ்கினர்.

தகவல் அறிந்த குளச்சல் கடலோர பாதுகாப்பு குழும போலீசார் சம்பவ இடத்துக்கு விரைந்து சென்று மீனவர்கள் உதவியுடன் கடலில் மூழ்கிய சிறுவர்களை தேடினர். கடந்த 2 நாட்களாக தேடும் பணி தீவிரமாக நடந்தது. நேற்று முன்தினம் இரவு மணவாளக்குறிச்சி அருகே சின்னவிளை, குருசுபாறை பகுதியில் சகாய ரெஜினின் உடல் மிதப்பதை அந்த பகுதியை சேர்ந்த மீனவர்கள் பார்த்தனர். இதுகுறித்து கடலோர பாதுகாப்பு குழும போலீசாருக்கு தகவல் கொடுக்கப்பட்டது. அவர்கள் விரைந்து சென்று பிணத்தை கைப்பற்றினர்.

இதையடுத்து நேற்று மதியம் குளச்சல் கடற்கரை பகுதியில் மற்றொரு சிறுவன் ரகீத்தின் உடல் மிதந்தது. இதை கண்ட கட்டுமர மீனவர்கள் பிணத்தை மீட்டு, போலீசுக்கு தகவல் கொடுத்தனர். அந்த உடலையும் போலீசார் கைப்பற்றினர். மீட்கப்பட்ட இரண்டு உடல்களும் ஆசாரிபள்ளம் அரசு ஆஸ்பத்திரிக்கு பிரேத பரிசோதனைக்கு அனுப்பி வைக்கப்பட்டது.

சிறுவன் சகாய ரெஜின் மண்டைக்காடு பகுதியில் உள்ள ஒரு பள்ளியில் 6-ம் வகுப்பும், ரகீத் குளச்சலில் உள்ள ஒரு பள்ளியில் 8-ம் வகுப்பும் படித்து வந்தனர்.

2 நாட்களாக சிறுவர்களின் உடலை தேடும் பணி நடந்தாலும், எப்படியும் உயிருடன் கிடைப்பார்கள் என்று நம்பிக்கையுடன் குடும்பத்தினர் இருந்தனர். ஆனால் அவர்கள் பிணமாக மீட்கப்பட்டனர். சிறுவர்களின் உடல்களை பார்த்து குடும்பத்தினர் கதறி அழுத காட்சி கல்நெஞ்சையும் கரைய வைப்பதாக இருந்தது. 3 சிறுவர்கள் கடலில் மூழ்கி பலியான சம்பவம் மீனவ கிராமத்தில் சோகத்தை ஏற்படுத்தி உள்ளது.