திருமருகல் அருகே கார் மோதி மூதாட்டி பலி டிரைவருக்கு வலைவீச்சு

திருமருகல்,

நாகை மாவட்டம் திருமருகல் ஒன்றியம் கேதாரிமங்கலம் வடக்கு தெருவை சேர்ந்தவர் வேலு. இவருடைய மனைவி கண்ணம்மாள் (வயது 60). கூலி தொழிலாளி. இவர் கடந்த 3-ந் தேதி மாலை ஆலமரத்தடி கடைத்தெருவிற்கு சென்று விட்டு தனது வீட்டிற்கு நடந்து சென்று கொண்டிருந்தார். அப்போது இவருக்கு பின்னால் சன்னாநல்லூரில் இருந்து திருமருகல் நோக்கி ஒரு கார் வந்து கொண்டிருந்தது. இந்த கார் எதிர்பாராதவிதமாக, நடந்து சென்று கொண்டிருந்த கண்ணம்மாள் மீது மோதியது.

இதில் அவர் பலத்த காயமடைந்து மயங்கி கீழே விழுந்தார். உடனே அக்கம் பக்கத்தில் உள்ளவர்கள் கண்ணம்மாளை மீட்டு ஏனங்குடி அரசு ஆரம்ப சுகாதார நிலையத்திற்கு அனுப்பி வைத்தனர். பின்னர் மேல் சிகிச்சைக்காக நாகை அரசு மருத்துவமனைக்கு கொண்டு செல்லும் வழியிலேயே கண்ணம்மாள் பரிதாபமாக இறந்தார்.

டிரைவருக்கு வலைவீச்சு

இதுகுறித்து திட்டச்சேரி போலீஸ் சப்-இன்ஸ்பெக்டர் கண்ணதாசன் மற்றும் போலீசார் வழக்குப்பதிவு செய்து தப்பி ஓடிய டிரைவரை வலைவீசி தேடி வருகின்றனர்.