திண்டிவனம் அருகே, மின்சாரம் தாக்கி விவசாயி பலி - வயலில் எரிந்த தீயை அணைக்க முயன்றபோது பரிதாபம்

திண்டிவனம்,

திண்டிவனம் அருகே உள்ள பாஞ்சாலம் கிராமத்தை சேர்ந்தவர் வாசுதேவன் மகன் ராமமூர்த்தி (வயது 48), விவசாயி. இவருக்கு சொந்தமான வயலில் இருந்த புற்கள் நேற்று காலை திடீரென தீப்பற்றி எரிந்தது. இதைபார்த்த ராமமூர்த்தி தீயை அணைக்க ஒரு வாளியில் தண்ணீரை எடுத்துக் கொண்டு வயலுக்குள் இறங்கி நடந்து சென்றார். அப்போது அவர் வயலில் அறுந்து கிடந்த மின்கம்பியை கவனிக்காமல் மிதித்து விட்டார்.

அப்போது அவரை மின்சாரம் தாக்கியது. இதில் தூக்கி வீசப்பட்ட ராமமூர்த்தி சம்பவ இடத்திலேயே பரிதாபமாக உயிரிழந்தார். இதுபற்றி தகவல் அறிந்ததும் ரோஷணை போலீசார் சம்பவ இடத்துக்கு விரைந்து வந்து மின்சாரம் தாக்கி பலியான ராமமூர்த்தியின் உடலை கைப்பற்றி பிரேத பரிசோதனைக்காக திண்டிவனம் அரசு மருத்துவமனைக்கு அனுப்பி வைத்தனர். மேலும் இதுகுறித்த புகாரின்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.