கொல்லிமலையில் பாலியல் தொல்லையால் 15 வயது சிறுமி சாவு கொலை வழக்காக மாற்றி போலீசார் விசாரணை

நாமக்கல், 

நாமக்கல் மாவட்டம் கொல்லிமலை வாழவந்திநாடு ஊர்புறம் பகுதியை சேர்ந்தவர் சந்திரன். இவரது மகன் ராஜசேகர் (வயது21). இவர் அதே பகுதியை சேர்ந்த 15 வயது சிறுமியை கடந்த சில நாட்களுக்கு முன்பு வலுக்கட்டாயமாக பாலியல் பலாத்காரம் செய்ய முயன்றார். இதில் சிறுமியின் உடல்நலம் பாதிக்கப் பட்டது.

இதையடுத்து பெற்றோர் அச்சிறுமியை செம்மேடு அரசு ஆஸ்பத்திரியில் சிகிச்சைக்காக சேர்த்தனர். பின்னர் அவர் நாமக்கல் அரசு ஆஸ்பத்திரியில் மேல்சிகிச்சைக்காக சேர்க்கப்பட்டார். இதற்கிடையே சிறுமியின் பெற்றோர் நாமக்கல் அனைத்து மகளிர் போலீஸ் நிலையத்தில் புகார் செய்தனர். அந்த புகாரின் பேரில் போலீசார் போக்சோ சட்டத்தின் கீழ் வழக்குப்பதிவு செய்து ராஜசேகரை கைது செய்தனர். பின்னர் அவர் சிறையில் அடைக்கப்பட்டார்.

இதற்கிடையே நாமக்கல் அரசு ஆஸ்பத்திரியில் சிகிச்சை பெற்று வந்த சிறுமிக்கு நேற்று திடீரென மூச்சு திணறல் ஏற்பட்டதாக கூறப்படுகிறது. இதையடுத்து சிறுமியை மேல்சிகிச்சைக்காக சேலம் அரசு ஆஸ்பத்திரிக்கு அனுப்பி வைத்தனர். அங்கு சிகிச்சை பலனின்றி சிறுமி பரிதாபமாக இறந்தார்.

இதையடுத்து போலீசார் போக்சோ வழக்கை, கொலை வழக்காக மாற்றி விசாரணை நடத்தி வருகின்றனர். பாலியல் தொல்லையால் பாதிக்கப்பட்ட சிறுமி இறந்த சம்பவம் கொல்லிமலையில் சோகத்தை ஏற்படுத்தி உள்ளது.