சோழத்தரம் அருகே, மொபட் மீது மோட்டார் சைக்கிள் மோதல்- தொழிலாளி சாவு

சேத்தியாத்தோப்பு,

சேத்தியாத்தோப்பு அருகே உள்ள கோதண்டவளாகம் கிராமத்தை சேர்ந்தவர் ஆறுமுகம் மகன் கோவிந்தசாமி(வயது 38). இவருடைய மனைவி தீபா. இவர்களுக்கு ஒரு மகள் மற்றும் மகன் உள்ளனர். கோவிந்தசாமி வெளிநாட்டில் தொழிலாளியாக வேலை பார்த்து வந்தார். கடந்த சில நாட்களுக்கு முன்பு இவர் விடுமுறையில் ஊருக்கு வந்திருந்தார்.

இந்தநிலையில் நேற்று முன்தினம் கோவிந்தசாமி, தனது மனைவி மற்றும் குழந்தைகளுடன் மோட்டார் சைக்கிளில் காடுவெட்டி நோக்கி சென்று கொண்டிருந்தார். சென்னை-கும்பகோணம் சாலையில் சோழத்தரம் அடுத்த கோவிந்தநல்லூர் என்ற இடத்தில் சென்ற போது முன்னாள் நின்று கொண்டிருந்த மொபட் மீது மோட்டார் சைக்கிள் மோதியது. இதில் நிலை தடுமாறியதில் கீழே விழுந்ததில் கோவிந்தசாமி பலத்த காயமடைந்தார். மற்ற 3 பேரும் லேசான காயத்துடன் உயிர் தப்பினர்.

இதையடுத்து படுகாயமடைந்த கோவிந்தசாமியை அக்கம்பக்கத்தினர் மீட்டு சிகிச்சைக்காக சிதம்பரம் ராஜா முத்தையா மருத்துவக்கல்லூரி மருத்துவமனைக்கு கொண்டு சென்றனர். அங்கு அவருக்கு முதலுதவி சிகிச்சை அளிக்கப்பட்டது. பின்னர் அவர் மேல்சிகிச்சைக்காக புதுச்சேரி ஜிப்மர் மருத்துவமனைக்கு அனுப்பி வைக்கப்பட்டார். ஆனால் மருத்துவமனைக்கு செல்லும் வழியிலேயே கோவிந்தசாமி பரிதாபமாக உயிரிழந்தார்.

இதுகுறித்து தீபா சோழத்தரம் போலீசில் புகார் கொடுத்தார். அதன்பேரில் போலீசார் வழக்குப்பதிவு செய்து விசாரணை நடத்தி வருகின்றனர்.