காதலனுடன் வசித்து வந்த பெண் தூக்கில் பிணமாக தொங்கினார் கொலை செய்யப்பட்டாரா? போலீசார் விசாரணை

கீழ்வேளூர்,

கீழ்வேளூர் அருகே சாட்டியக்குடியை சேர்ந்தவர் சேப்பன். இவருடைய மகன் செல்வக்குமார் (வயது 33). இவர் திருப்பூரில் உள்ள தனியார் நிறுவனத்தில் வேலை பார்த்து வந்தார். அதே நிறுவனத்தில் சகுந்தலா (22) என்பவர் வேலை பார்த்து வந்தார். இருவரும் காதலித்து வந்தனர்.

இவர்களின் காதல் விவகாரம் வெளியே தெரிந்ததால் செல்வக்குமார், சகுந்தலாவை அழைத்து கொண்டு சாட்டியக்குடிக்கு வந்து ஒரே வீட்டில் வசித்து வந்தார். சகுந்தலா தன்னை திருமணம் செய்து கொள்ளுமாறு வலியுறுத்தி வந்துள்ளார். இதனால் 2 பேருக்கும் இடையே அடிக்கடி தகராறு ஏற்பட்டுள்ளது.

தூக்கில் பெண் பிணம்

இந்த நிலையில் சம்பவத்தன்று வீட்டில் சகுந்தலா தூக்கில் பிணமாக தொங்கி கொண்டிருந்தார். இதுகுறித்து தகவல் அறிந்த வலிவலம் போலீசார் சம்பவ இடத்திற்கு விரைந்து வந்து சகுந்தலாவின் உடலை கைப்பற்றி நாகை அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

இதுதொடர்பாக போலீசார் வழக்குப்பதிவு செய்து சகுந்தலா தற்கொலை செய்து கொண்டாரா? அல்லது கொலை செய்யப்பட்டாரா? என பல்வேறு கோணங்களில் விசாரணை நடத்தி வருகின்றனர்.