ஆபத்தான அடர்ந்த வனப்பகுதி வழியாக 4 கிலோ மீட்டர் தூரம் நடந்து பள்ளிக்கு செல்லும் மாணவ-மாணவிகள்

தாளவாடி,

ஈரோடு மாவட்டம் தாளவாடி அடுத்த தலமலை ஊராட்சிக்கு உட்பட்டது தடசலட்டி இட்டரை மலைகிராமம். இங்கு சுமார் 80-க்கும் மேற்பட்ட குடும்பங்கள் வசித்து வருகின்றன. இங்குள்ள 30-க்கும் மேற்பட்ட மாணவ-மாணவிகள் 4 கிலோ மீட்டர் தூரத்தில் உள்ள பெஜலட்டி கிராமத்தில் இருக்கும் பள்ளிக்கு சென்று வருகிறார்கள். தடசலட்டி இட்டரை கிராமத்தில் இருந்து பெஜலட்டி வரை மண்பாதை மட்டுமே உள்ளது.

தினமும் காலை, மாலை என இருமுறை தடசலட்டி இட்டரை கிராமத்திக்கு 2 பஸ்கள் மட்டுமே இயக்கப்படுகின்றன. பெஜலட்டியில் படிக்க செல்லும் மாணவ-மாணவிகள் இந்த பஸ்சில்தான் செல்கிறார்கள்.

இந்நிலையில் கடந்த ஒரு வாரமாக தடசலட்டி இட்டரை கிராமத்தில் சாரல் மழை பெய்துவருகிறது. இதுபோன்ற மழை காலங்களில் மண்பாதையில் பஸ் சென்றால், சகதியில் சக்கரங்கள் சிக்கிக்கொள்ளும். அதனால் 2 முறை மட்டுமே வரும் பஸ்சும் ஒரு வாரமாக இயக்கப்படவில்லை.

இதனால் தடசலட்டி இட்டரை மலைகிராம மாணவ-மாணவிகள் காலை மற்றும் மாலையில் வனவிலங்குகள் நடமாடும் ஆபத்தான அடர்ந்த வனப்பகுதியில் 4 கிலோ மீட்டர் தூரம் நடந்து பெஜலட்டி பள்ளிக்கூடத்துக்கு சென்று வருகிறார்கள். பொதுமக்களும் இந்த பாதையைத்தான் பயன்படுத்துகிறார்கள்.

எனவே மாவட்ட நிர்வாகம் உடனடியாக தடசலட்டி இட்டரை கிராமத்தில் இருந்து பெஜலட்டி வரை தார்சாலை அமைத்து தரவேண்டும் என்று அப்பகுதி மக்கள் கோரிக்கை விடுத்துள்ளார்கள்.