சாத்தூர் அருகே பட்டாசு கடையில் வெடி விபத்து; 2 பேர் பலி

விருதுநகர்,

விருதுநகர் மாவட்டம் சாத்தூர் அருகே உள்ள மேட்டமலையில் சிவகாசி விஸ்வநத்தத்தை சேர்ந்த ரமேஷ் என்பவருக்கு சொந்தமான பட்டாசு கடை உள்ளது. இங்கு நேற்று இரவு பட்டாசு பண்டல்களை தொழிலாளர்கள் காரில் இருந்து இறக்கி கொண்டிருந்தனர். அங்கு ரமேசும் கடையில் இருந்தார். தொழிலாளர்கள் பட்டாசு பண்டல்களை கடைக்குள் இறக்கி கொண்டிருந்தபோது திடீரென உராய்வின் காரணமாக வெடிவிபத்து ஏற்பட்டதாக தெரிகிறது.

இதனால் பட்டாசுகள் பயங்கர சத்தத்துடன் வெடித்து சிதறின. இதில் கடை முழுவதும் தரைமட்டம் ஆனது. பட்டாசு பண்டல்களை ஏற்றி வந்த காரும் சேதம் அடைந்தது. மேலும் வெடிவிபத்தால் அந்த பகுதியே புகை மண்டலமாக காட்சி அளித்தது.

இதுகுறித்து தகவல் அறிந்ததும் சாத்தூர், சிவகாசியில் இருந்து தீயணைப்பு வீரர்கள் விரைந்து சென்று தீயை அணைக்கும் பணியில் ஈடுபட்டனர்.

இந்த வெடிவிபத்தில் சிக்கி பட்டாசு கடை உரிமையாளர் ரமேஷ் (வயது 35), சிவகாசி விஸ்வநத்தத்தை சேர்ந்த தர்மர் (40) ஆகியோர் சம்பவ இடத்திலேயே பலியானார்கள். 2 பேர் படுகாயம் அடைந்தனர்.

அந்த பகுதியே புகை மண்டலமாக காட்சி தருவதால் முழுமையாக தீயை அணைத்த பின்னர் தான், வேறு யாரேனும் வெடிவிபத்தில் சிக்கி உள்ளார்களா? என தெரியவரும். இந்த வெடி விபத்து குறித்து சாத்தூர் டவுன் போலீசார் விசாரணை மேற்கொண்டு உள்ளனர்.