துபாயில் இருந்து ரூ.1 கோடி தங்கம் கடத்தல் சென்னை விமான நிலையத்தில் பிடிபட்டது

ஆலந்தூர்,

சென்னை மீனம்பாக்கம் விமான நிலையத்திற்கு பெரும் அளவில் கடத்தல் பொருட்கள் கொண்டு வரப்படுவதாக விமான நிலைய சுங்க இலாகா அதிகாரிகளுக்கு ரகசிய தகவல்கள் கிடைத்தது. இதையடுத்து அதிகாரிகள் தீவிர கண்காணிப்பில் இருந்தனர். துபாயில் இருந்து வந்த விமானத்தில் ராமநாதபுரத்தை சேர்ந்த அப்துல் முனாப் (வயது 45), புதுக்கோட்டையை சேர்ந்த அஸ்கர் அலி (35) ஆகியோர் வந்தனர். அவர்களை சந்தேகத்தின் பேரில் தடுத்து நிறுத்தி அதிகாரிகள் விசாரித்தனர். அவர்கள் முன்னுக்குப்பின் முரணாக பேசி பதற்றமாக இருந்ததால் அவர்களது உடைமைகளை சோதனை செய்தனர். அதில் ரூ.1 லட்சத்து 30 ஆயிரம் மதிப்புள்ள 26 மடிக்கணினிகள், ரூ.19 ஆயிரத்து 200 மதிப்புள்ள வெளிநாட்டு சிகரெட்டுகளை மறைத்து வைத்திருந்தனர்.

பயணிகளிடம் சோதனை

பின்னர் தனியறைக்கு அழைத்து சென்று சோதனை செய்தபோது உள்ளாடைக்குள் அவர்கள் தங்கத்தை மறைத்து வைத்திருந்ததையும் கண்டுபிடித்தனர். பின்னர் அவர்களிடமிருந்து ரூ.56 லட்சத்து 36 ஆயிரம் மதிப்புள்ள 1 கிலோ 410 கிராம் தங்கத்தை கைப்பற்றினார்கள். அதேபோல் துபாயில் இருந்து வந்த மற்றொரு விமானத்தில் பயணம் செய்த ராமநாதபுரத்தை சேர்ந்த கலந்தர் அலி (24), சார்ஜாவில் இருந்து வந்த விமானத்தில் பயணம் செய்த ராமநாதபுரத்தை சேர்ந்த சுல்தான் சையத் இப்ராகிம் (32), அஸ்கர் அலி(25) ஆகியோரை சந்தேகத்தின் பேரில் நிறுத்தி சோதனை செய்தனர். உடைமைகளில் எதுவும் இல்லாததால் தனியறைக்கு அழைத்து சென்று சோதனை செய்தனர். அப்போது 3 பேரின் உள்ளாடைக்குள் மறைத்து வைத்திருந்த ரூ.59 லட்சத்து 60 ஆயிரம் மதிப்புள்ள 1 கிலோ 530 கிராம் தங்கத்தை கைப்பற்றினார்கள்.

4 பேர் கைது

மேலும் துபாயில் இருந்து வந்த விமானத்தில் சென்னை வந்திறங்கிய சிவகங்கையை சேர்ந்த சபீர்கான் (25) என்பவரின் உள்ளாடைக்குள் மறைத்துவைத்த ரூ.23 லட்சத்து 64 ஆயிரம் மதிப்புள்ள 587 கிராம் பறிமுதல் செய்யப்பட்டது.

நேற்று மட்டும் சென்னை விமான நிலையத்தில் சுங்க இலாகா அதிகாரிகள் நடத்திய சோதனையில், 6 பேரிடம் இருந்து ரூ.1 கோடியே 39 லட்சத்து 60 ஆயிரம் மதிப்புள்ள 3 கிலோ 527 கிராம் தங்கமும், ரூ.1 லட்சத்து 49 ஆயிரத்து 200 மதிப்புள்ள சிகரெட்டுகள், மடிக்கணினிகள் பறிமுதல் செய்யப்பட்டது. இது தொடர்பாக அப்துல் முனாப், கலந்தர் அலி, அஸ்கர் அலி, சபீர்கான் ஆகிய 4 பேரை கைது செய்தனர். மற்ற 2 பேரிடம் விசாரித்து வருகின்றனர்.