பெரம்பலூர் மாவட்டத்தில், அனுமதிக்கப்பட்ட வழியில் தான் விநாயகர் சிலைகளை ஊர்வலமாக கொண்டு செல்ல வேண்டும்

பெரம்பலூர், 

விநாயகர் சதுர்த்தி விழா வருகிற 2-ந் தேதி நாடு முழுவதும் கோலாகலமாக கொண்டாடப்படவுள்ளது. இதனை முன்னிட்டு பெரம்பலூர் போலீசார் சார்பில் பெரம்பலூர் மாவட்டத்தில் விநாயகர் சிலைகள் வைப்பது தொடர்பாகவும், சிலைகளின் ஊர்வலம் தொடர்பாகவும் விழாக்குழுவினருடனான ஆலோசனை கூட்டம் நேற்று பெரம்பலூரில் உள்ள ஒரு மண்டபத்தில் நடந்தது. இந்த ஆலோசனை கூட்டத்திற்கு பெரம்பலூர் மாவட்ட போலீஸ் சூப்பிரண்டு நிஷா பார்த்திபன் தலைமை தாங்கினார். துணை போலீஸ் சூப்பிரண்டுகள் ரவீந்திரன் (பெரம்பலூர்), தேவராஜ் (மங்களமேடு) ஆகியோர் முன்னிலை வகித்தனர்.

கூட்டத்தில் போலீஸ் சூப்பிரண்டு நிஷா பார்த்திபன் பேசுகையில், விநாயகர் சதுர்த்தி விழாவினை முன்னிட்டு பெரம்பலூர் மாவட்டத்தில் பல்வேறு இடங்களில் விநாயகர் சிலையை நிறுவ உள்ள அமைப்பின் ஒருங்கிணைப்பாளர்கள் நிலத்தின் உரிமையாளர்களிடமிருந்தும், அரசு இடமாக இருப்பின் சம்பந்தப்பட்ட உள்ளாட்சித் துறையிடமிருந்தும், நெடுஞ்சாலை மற்றும் வேறு துறைக்கு சொந்தமான இடமாக இருப்பின் தொடர்புடைய அலுவலர்களிடமிருந்து தடையின்மை சான்று பெற்று வருவாய் கோட்டாட்சியரிடம் விண்ணப்பித்து அனுமதி பெற்றிருக்க வேண்டும். நிறுவப்படவுள்ள சிலைகள் 10 அடிக்கு மேல் இருக்க கூடாது.

விநாயகர் சிலைகளுக்கு இரும்பு அல்லது சிமெண்டிலான மேற்கூரை கொண்டு கொட்டகை அமைக்க வேண்டும். தென்னங்கீற்று போன்ற எளிதில் தீப்பற்றக்கூடிய பொருட்களை விழாக்குழுவினர் கட்டாயம் பயன்படுத்த கூடாது. பள்ளி, கல்லூரிகள், மருத்துவமனை ஆகியவை அருகே விநாயகர் சிலைகள் வைக்க கூடாது. சிலை வைக்கும் இடத்தில் பெட்டி வடிவிலான ஒலிப் பெருக்கியை பயன்படுத்த வேண்டும். கூம்பு வடிவ ஒலி பெருக்கியை பயன்படுத்த கூடாது. விநாயகர் சிலைகள் ஊர்வலத்தை மதியம் 12 மணிக்குள் தொடங்க வேண்டும். ஊர்வலத்தின் போது பட்டாசு போன்ற வெடி பொருட்களை கட்டாயம் பயன்படுத்தக்கூடாது. சிலைகளை மாவட்ட நிர்வாகத்தின் மூலம் நிர்ணயிக்கப்படும் இடங்களில் மட்டுமே கரைக்கப்படவேண்டும்.

போலீசாரால் அனுமதிக்கப்பட்டு வழியில் தான் விநாயகர் சிலைகளை ஊர்வலமாக கொண்டு செல்ல வேண்டும். வேறு வழியில் கொண்டு செல்லக்கூடாது. விநாயகர் சிலைகள் வைப்பது தொடர்பாகவும், சிலைகள் ஊர்வலம் தொடர்பாகவும் அரசு வகுத்துள்ள வழிமுறைகளை விழாக்குழுவினர் பின்பற்ற வேண்டும் என்றார். மேலும் போலீஸ் சூப்பிரண்டு, விழாக்குழுவினர் சந்தேகங்களுக்கு பதிலளித்து பேசினார். கூட்டத்தில் போலீஸ் இன்ஸ்பெக்டர்கள் வனிதா (போலீஸ் தனிப்பிரிவு), அழகேசன் (பெரம்பலூர்), சுகந்தி (பாடாலூர்), கலா (அரும்பாவூர்), கதிரவன் (குன்னம்), நாஞ்சில்குமரன் (மங்களமேடு), போலீஸ் சப்- இன்ஸ்பெக்டர்கள், போலீசார் ஆகியோரும் விழாக்குழுவினர்களுக்கு ஆலோசனைகளை வழங்கினர். இதில் பெரம்பலூர், வேப்பந்தட்டை, குன்னம், ஆலத்தூர் ஆகிய 4 தாலுகாவில் உள்ள விழாக்குழுவினர் ஏராளமானோர் பங்கேற்றனர்.